Faalauiloa le CD pese a Manogi Tuiletufuga

O le tamaitai talavou o Manogi Olive Asenati Tuiletufuga, ua tatalaina nei sana tautua pese e ala i sana CD ua amata faalauiloaina nei i Niu Sila.
O lea alo o le atunuu e na o le 18 tausaga le matua o lona soifua peitai ua ia ausia nei se tasi o ona faanaunauga sa soifua ae ma ia, o le fia avea lea o ia ma se tamaitai pese.
O lona ausia o lea moemitiga ua ia faailoa ai foi ma le mafuaaga o le igoa ua faaigoaina ai lana CD i le “FAITH”.
Sa soifua pe na fanau le tamaitai o Manogi i Samoa peitai na malaga mai ma ona matua ma nonofo i Niu Sila nei ae faatoa tasi lona tausaga.
O le tausaga 2003 na tuua ai Niu Sila ae malaga atu ma faamautu i Brisbane i Ausetalia seia oo mai i le taimi nei. O le CD sa amata pueina i Brisbane, ae faamaea mai i Niu Sila.
O le kamupani puepese a se tasi foi o alo tautaua o le atunuu i lea ituaiga galuega, le sususga ia Pene Matautia, sa tapenaina lea galuega.
Na tautino le tamaitai o Manogi, o le tau amata mai o lona taumafai sa tele ni manatu faavaivailoto sa osofaia ai lona taumafai, peitai o lona galue malosi e tineia ia manatu ae tuu atu atoa lona talitonuga ma le faatuatua i le Atua, na te mafaia ai ona fai ma faataunuuina lona faamoemoe.
O le mafuaaga tonu foi lea ua ia filifilia ai le upu “faith” poo le “faatuatua” e fai ma taiulu, pe faaigoaina ai o lana tautua pese ua amataina nei.
O se tasi o tautinoga a le tamaitai pese na ia fiafia foi e faailoa, o ia sa mulimulitai lava i tulaga aao o si ona tina i le taleni pese, ma o ia foi lea sa le gata ina fai ma faataitaiga mo ia, ae o lona fesoasoani foi lea sa faatonutonu folau i lona taumafai. Sa taua foi e Manogi o lona tina e mālie ma manaia tele lona siufofoga.
Sa auai lona tina i le aufaipese tele a le ekalesia i totonu lava o le latou afioaga, ae mulimuli ane sa avea foi o se tasi o tamaitai pese a le Autalavou mo Keriso (YFC) a o taitaia e Pastor Tavale Mataia le galuega a le Youth for Christ.
E talitonu le tamaitai pese o lona tina sa amata faameaalofaina mai e le Atua, a o auai faatasi ma nisi sa iloga lo latou tulai mai i le usuina o viiga o le Atua, i vaitaimi ua mavae, e pei o le susuga ia Peter ma le faletua o May Crichton, Pastor Samoa Unoi ma le susuga ia Viliamu Mafoe ma isi.
O matua o le tamaitai pese, o Tuiletufuga Tiafau e soifua mai ia Tuiletufuga Limo o Apia, a o lona tina o Sene Tuiletufuga mai le afioaga o Vailima.
O loo iai nei le tamaitai pese ma ona matua i Niu Sila, ma ua amata nei ona faatauina atu lana CD i le tele o faleoloa o loo agai i ai le atunuu mo faatauga masani. Ua iai foi le faamoemoe a maea ona faatumauina nofoaga mo le maketiina o le CD i Niu Sila, ona toe taliu atu ai lea i Ausetalia ma avanoa ai foi lea tautua mo le maketi.