O Grace na fanau i Niu Sila nei, o ona mātua o Aileone Foaga lona tamā a o Judy Foaga lona tina, mai le Alalafaga o Samalaeulu i Savaii ma Fusi Safata i Upolu.
O le amataga o le olaga o Grace sa taumafai lava ina ia tautala faa-Samoa mai lona laititi, peitai ane ona sa auai atu i le Aoga Amata (Kindy Faaperetania i le lotu Aso Fitu Palagi); o iinā ma amata mai ai ona sui le gagana i aso uma, ua tautala i le Broken English, ma o se faanoanoaga sili lena mo ma‘ua ona a tautala faasamoa ua lē malamalama ai nisi, ae pe a nanu foi ua lē malamalama
ai nisi.
O nisi taimi e pei a e lagona ai le mā ona e lē malamalama ana friends (non speaking Samoan) i lana gagana, e mafua mai ona o mafutaga ma uo ma nisi e ese mai i le aiga.
O nisi foi taimi a fia taliē o‘u uso ma tuafāfine ona nanu lea ia Grace ae faatalitali i le tali a Grace ona alu lea o le taliē…..Ina ua atoa lona 3 tausaga, sa ma faalogoina ai i pesega i a matou lotu afiafi ma taeao, ua pesepese Grace i upu o pesega Samoa ia matou lotu (taeao ma afiafi).
O se auala sili lena ma tāua, ona ou te lei iloa e mafai e se tamaitiiti laitiiti faapea ona ia pueina pesega i se taimi vave. Sa ou taumafai e amata pueina lona leo i nai telefoni selula (cell phone), ma avea ai ma ana mea fiafia le fao ese atu o le telefoni, ma toe faalogologo i ana pese Samoa ma toe ata ai lava ia.
O totonu la o la matou Ekalesia Samoa, ua avea ai Grace o se tagata a fia faalogologo lava se isi i taimi o polokalame a le fanau, ua valaau Grace e tu i luga e usu le pese. Ae lē gata i lea ua iai faaipoipoga Faa-Samoa ua pese ai Grace i le 3 ma le ‘afa tausaga.
Na avea le taualaga mai o le FAGASA i le leitio, sa oso ai loa se lagona o le a ma faia le tulaga lea, ia faatāua le gagana i fanau, ina ia silafia e le tamaitiiti lona faasinomaga. Na amata ai iinā ona play CD Samoa (pesega Samoa) i totonu o la matou aiga.
O iinā la na ou iloa ai le saoasaoa o le pikiina e le tamaitiiti, o le gagana, ae lē gata i lea o DVDs ata Samoa. O le tele ia o fesili a Grace e faatatau i ata Samoa, ma sa taumafai lava e faamatala i ai le aganuu. E oo mai la i le taimi lenei, o lea lava e viga ua fia oo i Samoa.
Na oo mai ia te au se lagona a o se miti mo lo‘u afafine, ina ia avea o se pine lelei ma aogā le alagatatau ai loa ona pueina sana CD i le gagana Samoa ae faatau atu. E lē gata ia lu‘i ai nisi tamaiti Samoa, ae fesoasoani foi i se tupe mo lana aoga.
O le faafitauli muamua e taugata lona faatinoga, sa ou mafaufau ma faailoa i le Atua i talosaga, afai o Lana foai ma le fanau o Meaalofa, o le a ou faia e tusa ma lona finagalo.Na ou fesilisili solo i Fale Pue Pese mo le faatinoga, e matuā taugata lava. Na tonu ai i lo‘u manatu, o le a ou taumafai e faaaluina se tupe ou te maua e faatauina ai masini pue pese, ma o le mea foi e faafetai ai i le Atua ona o lona tina e Ta Piano, ae o a‘u o le Kitara.
Ou te iloa o se faamanuiaga lea mo Grace auā o ona mātua e fiafia i le musika. Ae sili atu ai i lena, ia amata lona olaga laititi i pesega faaleagaga, ia avea o se fatu ina ia tupu ma ola, ma iloa e Grace e iai lona Atua o lē na foai ia te ia le meaalofa ma le gagana.
O le taimi nei la, ua atoa lona 5 tausaga ma ua alu i le atoa lana faasamoa. Talu ai ua 2 a‘u Albums (Aileone Foaga) na pueina i Niu Sila nei, atonu o iinā na pikiina ai e Grace le taimi ou te tāina ai le Kitara ma usu pese Samoa.
Sa vaavaai lava se auala e faalauiloa ai o ia ona ou te iloa mai le tolu i le fa tausaga, e lē o mafai e nisi tamaiti Samoa ona tautatala faasamoa i le gagana atoa. Ua faailoa nei nisi o ona ata ma videos i luga o la matou website: www.foagamusic.co.nz. O le a mafai ai foi ona e faatauina le CD a Grace.
Ua faatauina nei i le RSL Samoa Shop, i Henderson Auckland ma le Talofa Shop i Wellington, ae o le a taumafai lava e oo uma i nisi o faleoloa i Niu Sila nei.
Sa taumafai lava ia a‘oina ia te ia pese Samoa faigofie. Ae ona e iai ana friends (non Samoans) o le na mafua ai ona tuuina i totonu pese faaperetania e 2. Ae o le a lē gata ai iina lona faaauauina o le taleni, ma ou te iloa o la tatou gagana Samoa o lo tatou Tofi.
Fai mai la matou faifeau “Tuu tamaiti e a‘o e faiaoga nanu, ae aua lē a‘o i ai tou nanu e leaga ai Egilisi a tamaiti”. Ia o totonu lava o le matou aiga e faasamoa i taimi uma, o si o‘u toalua foi e faiaoga i vasega a le fanau i Aoga Aso Sa, e matuā faamalosia lava le tautala faasamoa i taimi uma i totonu o la matou Ekalesia Samoa Aso Fitu o le Toe Afio Mai i Palmerston North.
Na mae‘a le pueina o le CD a Grace i le 4 tausaga ma le 8 masina, peitai ane sa tau sefe lava se tupe ina ia faaaogāina mo le maketiina. Sa ma‘ua fuafua loa o lona aso muamua i le Aoga ua atoa lona 5 tausaga, o le a faalauiloa ai loa.
FAGASA:
Ou te matuā lagolagoina lava le a‘oa‘oina o le Gagana Samoa e lē faigata, pe afai e faatauina e mātua ma faailoa i Fanau lo tatou siosiomaga. Aemaise lava o totonu o le Aiga.
