Ua faatauina atu nei ma avanoa i le maketi se ata ua mae‘a ona tuuina i le DVD, mo le mamalu o le atunuu i Niu Sila mo ana maimoaga.
O le ata e pei ona malaga faapitoa mai ai le sui o le komiti tumau a le Ekalesia Metotisi mai le afioaga Tafataa i Falealili i Samoa, mo lona faalauiloaina i Niu Sila.
E iai ni vaega tāua o lenei ata ua mae‘a ona tapenaina ma tuufaatasia e le ekalesia, mo le faamaoemoe ina ia silafia ai e tamafanau a le afioaga o loo alala i Niu Sila le uiga moni ma le autū na mafua ai ona tuufaatasia lea ata.
O le taunuu ai o le afioga ia Alaimoana i Aukilani, na afea ai le Samoa Times, ma na fesiligia ai foi i le mafuaaga ma le autū o le faatauina o lea ata.
O se tulaga ua saunia ma tapenaina ai lea faamoemoe, ona e lē gata o se sailiga seleni a le Ekalesia Metotisi mo le toe faaleleia o le malumalu tapuai o le nuu sa faaleagaina i le mala faalenatura i le tausaga talu ai, ae ua mafai ai foi ona silasila i ai alo ma fanau a le afioaga, i le tulaga moni lava o loo iai foliga ma vaaiga i le malumalu i le taimi nei.
Ua faapea foi ona tuuina i ai ma isi vaaiga faaleaganuu, e faaopoopo i ai i lea taumafaiga ma le atinae a le ekalesia.
O tala faa-Samoa o loo iai i lenei ata, o loo auiliili ai le mafuaaga o le igoa o le Vaiula ma mea na tutupu mai ai.
O le Vaiula e lē o toe po se lilo, sa tau vesia ai le lotoifale o le afioaga muamua, ona o le mau eseese aemaise ai o le agai atu o nisi o le aufaipisinisi e pueina ma tau faamatala talaaga ma tala o le vavau mai le afioaga ma le Vaiula, ma faatau atu e saili ai a latou tupe.
Peitai e pei ona faaalia e le afioga ia Alaimoana, o le sui na malaga mai Samoa, o le avanoa lelei lenei ua mafai ai e le afioaga lava latou ia ona talatala uiga o le vavau ma mafuaaga, aemaise ai talatuu i totonu lava o Tafatafa, auā e manino ma malamalama atili ai le silafia e le lautele o le atunuu.
O le isi vaega tāua o loo iai i totonu o lenei lava ata, o le fesootaiga o foafoaga paia a le Atua, ma le Ie o le Auafa, o se tasi o tala faa-Samoa na afua mai foi i totonu lava o Tafatafa.
