Ua faalauiloa nei i Niu Sila le uluai CD a le susuga Kalifa Komiti, lea e faaigoaina o le “Telefoni Maomoomo”.
O le susuga Kalifa Komiti, o se tasi o alii pese ua amata ona a‘ea‘e mai ana ia foi fatuga faa-Samoa, ma e 10 pese fou (original), poo pese o lea faato‘ā fatuina lava e Kalifa ma nisi sa latou galulue faatasi.
E taga eseese ma mālie upu o pese i lenei CD, ae i se manatu o le alii pese na ia ta‘ua ai, e leaga foi le tāotasi i se fatuga, e peiseai ona pau lena o le itulagi o loo taulai i ai le mafaufau o le fatupese.
E manaia le iai o ni pese ‘slow’ e faanofomālie ai foi taimi o malologa, ae manaia foi le fefiloi ma pese vave, e oso ai le fia siva ma maua ai ma se faamalositino.
O le uluai taumafaiga lenei a le susuga Kalifa.
O le vaiaso na tea nei na faato‘ā faalauiloa ai i luga o le Radio Samoa “Le Telefoni Maomoomo” ma ua faatauina atu foi i faleola eseese i le atunuu, ae o le tausaga na tea nei, 2009 sa tatala ai lenei CD i Samoa.
I ni lipoti mai Samoa, e 4 lelei vaiaso sosoo o tulaga muamua pea le pese lenei i le “Telefoni Maomoomo” lea foi e igoa ai le CD, i le faatulagaina o pese e sefulu i se tasi o leitio faasalalau i Samoa. E iai le faamoemoe o le susuga Kalifa, o se taimi lava a lē o le faaiuga o le tausaga nei, poo le amataga o le tausaga fou, o le a toe tatala mai ai lana CD lona lua. O le sini o lenei alii pese, ia tele ni pese fou (originals) i ana CD, e faaaogā i ai se tomai ua ia maua, ia lē gata e iloa usu le pese, ae ia mafai foi ona ia fatuina ma lagiina ana lava pese.
E tovā pese slow ma pese vave, o pese i ni mafutaga, pese o fautuaga i tupulaga talavou, e iai foi fatuga a le alii pese o loo toe tōmanatu ai i le faagasologa mai o lona olaga ma lona faasinomaga, sa luitauina ai ni suiga lelei.
O nisi o vaega o le atunuu ua amata ona faatau atu ai le CD, “Telefoni Maomoomo”, o le TNA Superette, le faleaiga o Pinati i Otahuhu, ma le maota lava o Kalifa i Magele. O le susuga Kalifa e tupuga mai ona alalafaga o Matautu i Lefaga, Lalomanu ma Saleaumua i Aleipata.
