O Samoa o le Penina o le Pasefika, ona o ana tu ma agaifanua, faapea foi ana taleni e aofia ai ma ana fatufatuga faamusika.
O le taleni pese o se meaalofa mai le Atua, o ana afioga, aua le tutuina le lamepa ma tuu i lalo, ae faasusulu atu i le lalolagi uma. Ua soo le atulaulau i alo ma tamafanau a Samoa e fiafia ma talenia i le musika.
O le AsoToonai na mavae atu, aso 30 o Iuni na faalauiloa ma tatala aloaia ai le taumafaiga poo le CD lona 6 a se tasi o alo lauiloa o le atunuu, le susuga ia Tala Pauga, na faalauiloa ai ma lana uluai MTV poo le ata o le tuufaatasia o lana taleni ma pese, o se faatinoga faaonaponei ua alualu i luma lona faatāuaina, ma e ono avea ma metotia mautu mo le lumanai.
O le faamoemoe o le susuga ia Tala na faataunuuina i le nofoaga o faafiafiaga i le pitonuu o Sunshine, lea na matuā faatumulia i le paia ma le mamalu lasilasi o Samoa, aemaise o nai ona aiga, uo ma paaga, faapea foi i latou e fiafia i ana fatufatuga.
O le fofoga o le po o le susuga ia Sau Siufanua Seuseu na malaga mai Aukilani e lagolagosua i le faamoemoe o si ana uo mamae.
E pei lava foi o le masani i po tetele faapenei, na faaalia le alofa tulai ma le aao mafola o Samoa e ala i siva Samoa ma sausaunoaga e molimoli ai le agaga o le faamalo ma le faafetai, ona o le faamoemoe ua taunuu o se tamafanau.
O le CD na pueina i le Jstyla Production, o se auaunaga a se tasi o alo o Samoa ua iloga lana tautua e le gata i Melepone, ae o itu e fa o le Lalolagi, ma ua tele foi tamaalii pepese lauiloa ua o latou galulue faatasi, o se tasi o a latou auaunaga o le Faaili lea a le Mt Fao, ua lauiloa i faafiafiaga o faamoemoe ma aso tetele i totonu o Melepone, lea foi na latou faafiafia ma galulue i le faamoemoe o le susuga ia Tala.
Ua faataoto fuafuaga mo le itu i Saute o le aai o Melepone, le faaitu o Dandenong i le Aso Faraile nei, ona toe taliu mai ai lea i Sunshine i le Aso Toonai e sosoo ai, ma faasolo atu ai i Niu Sila.
