Faalauiloa Ata TV o loo autū ai ma se tamaitai Samoa i Melepone

Ua latalata i le tausaga o faagasolo le pueina ma tau tuufaatasia ni ata pupuu (short film) e faaali faapolokalame faasolo i luga o nisi o ala ata i TV i Ausetalia, ma o se mitamitaga sili, ona o loo autū se tasi o nei ata i le tamaitai Samoa o Maria Tuua.
O le po o le Aso Toonai na mavae atu na tatala aloaia ma faaali ai vaega otooto ta‘i fasefulu minute o nei faamoemoe. Na faaalia e Maria, o se taimi o le tausaga ua tea na ia talosaga ai mo le avanoa sa faasalalauina, ma faamanuiaina ai lana tusi talosaga, ona amata ai loa lea ona faatalatalanoa ma tuufaatasia le talaaga o lona soifua ma le mafuaaga na malaga mai ai e sailimalo i Ausetalia, ma amata faasolo ai lava ma le pueina o le ata, e lē gata o ia, a o nai ona tauaiga faapea ma nisi o ana uo o loo aofia uma ai i le faamoemoe.
Na ia saunoa foi, e ui ona o le fita  ma le tele o taimi faaalu, ae o lea ua tau lau o le faamoemoe e viia ai le Matai sili. E silia ma le selau tusi talosaga mo avanoa e sefulu ma le lua, lea na faamanuiaina ai Maria i le to‘a sefulu ma le lua, sa faamaopoopo ma pueina uma talaaga o tagata mai atunuu eseese ia e 12.
Peitai ane ina ua fai le filifiliga faaiu a le kamupani pueata lenei mai Peretania, ua piki ai na o ata e fā ia na faalauiloa i le Aso Toonai, e aofia ma le talaaga o le taupou Samoa.
Sa matuā faatumuina le malu i le paia ma le mamalu o tagata mai atunuu eseese ia e aofia i ata e 4 na filifilia, ma na mataina le tatalaina o le vaega Samoa, ona o le solo agai mai i totonu, na laeiina ai e Maria laei taupou faa-Samoa e pei o le tuiga ma ona teuga eseese, ae aiuli ai i ona autafa le sogaimiti ma le tamaitai e laei i le malu, lea ua silamio atunuu eseese, i au measina Samoa, ona o le sailimalo o o tatou tagata ma le faaeaea ia tatou tu ma aga i fanua.
Talosia ae faaauau ai pea nei manuia ma faalauiloa atu ai Samoa i tulimanu e fā o Ausetalia ma isi atunuu. O loo faagasolo pea le filifiliga a le kamupani, poo ai le ata e tasi o le a mauaina le faailoga atoa, ona faalauiloa atoa ai lea ia Ausetalia.