O upu o le Tusi “A‘oa‘o le tama e tusa ma ona ala, a oo ina matua e le toe tea ese ai”.
O le taeao o le Aso Toonai, aso 28 o Iulai na feagai ai le tele o Aoga Aso Sa a le Ekalesia EFKS ma suega e pei ona masani ai i tausaga taitasi.
E lua Ekalesia i le itu i Matu sa faia faatasi ma nisi i le itu i Saute e aofia ai Aoga Aso Sa a le susuga ia Rev Osa Nanai ma le faafeagaiga ia Rev Ariota Tiatia.
O le pulega lea i le itu i Matu lea o loo vaaia e le susuga i le toeaina ia Rev Lau‘ie Lupematasila ma le faletua ia Autalaga. O nisi sa faamae‘aina i le vaiaso ua tuanai ona o loo malaga faafeagaiga i le faaulufalega o loo faia i Sini.
I le Pulega a Saute na matuai masii le Ekalesia i le malumalu e tapuaia taumafaiga a alo ma fanau. Sa vaaia e faiaoga Aso Sa poo latou ia o Supervisors ae togi tasia suega e le Toeaina o le Pulega, susuga ia Rev Tauaaga Mataafa faapea le lagolagosua a le A‘oa‘o iu mai Malua, susuga ia Faasui Maua.
Na a‘e manuia taumafaiga a le fanau ma o se tala fiafia i le mataala o mātua e a‘oa‘o fanau i ala o le Alii.
O le tele o tamaiti e i le va o le 90 ma le 99 maka. Sa tapuaia e mātua ma aiga tausinioga a alo ma fanau, lauina le iuga ma faia ai se taumafataga i le maota lava o le Ekalesia poo le hall i Learoyd, Acacia Ridge.
Na saunia faapitoa se ipu lapoa mo se tamaititi na te ausia le 100 maka sa tauva uma i ai le Aoga Aso Sa atoa a le Ekalesia EFKS Southwest ma faapea ona faamanuiaina ai le tamaitai o Tu‘avao Mataafa e 11 ona tausaga.
O se alo e faasino ia Mataafa Samuelu Mataafa mai Salesatele Falealili ma Lufilufi faapea le faletua ia Alisi Mataafa mai Lufilufi lava.
Sa momoli le agaga faafetai o le susuga i le Toeaina o le Pulega (Rev Tauaaga Mataafa) i faiaoga Aso Sa ona o la latou foi pitolaau faapea mātua i le faataunuuina o o latou tiute masani. O se faamoemoe na vaaia ai aao agalelei o le Atua auā na amataina i le manuia toe faaiuina foi i le fiafia.
