O le faaiuga lava o le tausaga e tele ina faamae‘a ai fuafuaga ma soo se faamoemoe, ma o le taualuga foi lea poo le iuga o se seleselega. Peitai sa fuafuaina ai e le kalapu a le “Lau Olive Mata” le Aso Gafua lona lua o Novema e fai ai le latou tufagaipu. Ua talafeagai tonu lea manū e lei oo i taimi e tele ai le pisi ma le vevei.
O lenei taamilosaga o tagapolo (golf) ua mafai ona tuufaatasia ai le aufaigaluega a le Atua mai isi fata faitaulaga aemaise ia tamalii o le atunuu faapea i latou e fiafia tele i lenei faagatama.
O le taamilosaga lenei e 4 ona vae, e pei ona silafia e i latou e naunau pe fiafia i ai, o loo faataamilo ai i Perisipeni.
O le vae mulimuli sa faataunuuina i le Aso Gafua o le vaiaso ua tuanai ma faaiuina ai foi taaloga o lenei tausaga 2010. Sa matuā faatumulia le malae tapolo i Logan City Golf Course, e lē gata o le autaaalo ae sili ai ona toatele le autapuai i le molimauina foi o suega siamupini o lenei tausaga.
Sa mafai ona lagolagoina lenei faamoemoe e nisi o faipisinisi o le atunuu e pei o le Sina World Travel ma le Imex Money Transfer (Patricia ma Steve Sevele) faapea le Uncle Sam’s Catering (Poulava Sa ma Lorna Matautia).
Na amataina lenei taaloga i se tatalo na saunia e le susuga i le faafegaiga ia Rev Ionatana Faaiuaso (EFKS Logan City) ona faasolo loa lea o le toe taaloga poo le vae mulimuli o le taamilosaga e pei ona masani ai.
O le mae‘a ai o le taaloga i lea aso, ona alo atu lea i se taumafataga mamafa na tapenaina e le tofa ia Poulava ma le tausi ia Lorna.
O nei lava foi taaloga o faamasaniga lava ma faamalositino ma le faaaogāina o taleni mai le Alii. Na taualuga i tufatufaga faaailoga na saunia e sui o le kalapu a le Lau Olive Mata i Logan City.
O faaiuga la nei o le taamiloga o le 2010
Ipu a susuga i Faafeagaiga: Siamupini o le Ipu o le Gross – Bishop Tupu Aiono; Siamupini o le Ipu o le Nett – Rev Tapenaga Reupena.
Ipu a Tamalii: Siamupini o le ipu o le Gross – Terry F. Fauea; Siamupini o le Ipu o le Nett – Poulava S. Matautia.
Ua faia nei se malologa a le autaaalo ona toe sauni foi lea e amataina taaloga i le tausaga fou pe a aulia atu i le alofa o le Atua. E avea ai le nusipepa a le Samoa Times e molimoli atu ai se faafetai tele i kamupani sa lagolagoina le faamoemoe, pe ana leai la outou lagolago e lē mafai ona matagofie le aso mulimuli. Faafetai foi i le autaaalo tau pule ola le tausaga fou tatou toe feiloai ai i le tatou malae masani.
