Ua amata tuuaga o le kuata muamua o aoga a le fanau laiti i aoga a le Malo ma Aoga a Lotu i totonu o Samoa.
O se tuuaga lenei ua fuafua e aofia ai ma malologa o le faamanatuina o le Tutoatasi o Samoa i lenei tausaga.
O le vaiaso mulimuli o le uluai kuata o le aoga na molimauina ai le tele o aoga laiti na faatino a latou tausinioga o lauga faa-Samoa ma lauga i le gagana Peretania. Na faamanatu foi ma aso e faatāua ai le aganuu e ala i tausinioga o Siva faapea ai tausinioga o soo se auala ua unaia ai le gagana Peretania.
Faaalia e le tamaitai Pule Lua o le aoga laititi a Magiagi o Leone Pomare, o se auala lenei ua faatino ai galuega a le fanau i ni auala faatauvaga ma o le tele lava o nei tausinioga ua faia ona o le manaoga ia iai se isi auala e saga a‘oa‘o ai le fanau, e ese mai i a‘oa‘oga i aso uma ua faatino i totonu o le potu aoga.
O le aoga la a Sagata Maria i Savalalo na faatino le aso ua faamautu ai le taleni o le Siva Samoa, o se vaega o le Gagana ma Faafiafiaga faa-Samoa ua unaia i le aoga laititi lenei i Savalalo.
O le fanau uma na vaevae i vasega ma o iina na tausinio ai i le faaalia lea o le tomai o fanau i le siva Samoa atoa ai foi ma nisi o faafiafiaga faaopoopo na faatautaia uma e faiaoga ma mātua auā le faalautele ai foi o le tomai o le fanau laiti i lea vaega tāua o le ola a‘oa‘oina.
Mo le fanau i le aoga laititi a Magiagi, o le faatāua na ave ia latou tuufaatasiga o le faaiuga o le kuata, na ave lea i le gagana Peretania.
O tauvaga a fale e fā na vaevae i ai le aoga atoa na aofia ai siva, o pese, o lauga aemaise o taleni ua faaali uma ma faaaogā ai le gagana Peretania.
O le faatāua na ta‘ua e Pomare ina ia vaavaai poo ā nisi o auala ua o latou tuufaatasia e faatino i ai le tauvaga e vave ona pu‘e ai le fanau ma na manino le tauvaga hip-hop ma le tauvaga o pese faapapalagi, o faiga solo ma faiga lauga na maoae ai le taumafaiga a le fanau.
O faaiuga lava o kuata taitasi ua atofa e faiaoga e faatino ai faaaliga faalauaitele ia a fanau ma o se avanoa ua mafai ai foi ona silasila mātua i le tulaga o iai galuega faatino a faiaoga ma a latou vasega taitasi. Faato‘ā toe a‘e aoga i le aso 8 o Iuni i le mae‘a ai o le faamanatuina o le Tutoatasi.