Ua lima tusitusi le Itu agai ma tuuaia le Palemia ma le Malo i le filifilia o sui o Komiti Faafoe mo Matagaluega ma Faalapotopotoga a le Malo.
“Ua maumau le taimi na faasalalau ai ia avanoa mo ni tagata agavaa ua iai le tomai ma le poto a‘oa‘oina e tauaveina ai ia tofiga, ae na o tagata lava e lagolagoina le HRPP ua filifilia”.
O le finagalo o le taitai o le Itu agai, Palusalue Faapo II, na faalauaitele i se feiloaiga ma tusitala. “Leai lava se uiga na faasalalau ai ae ua toe tofia lava nisi o sui sa iai muamua i ia komiti, ae o tagata e latalata tele i le alii Palemia ma ana pulega malo”.
O le sā‘i o le finagalo o le taitai o le Itu agai e lē o aveesea ai lona agaga fiafia i le finagalo o le Malo ua faasalalau faalauaitele ai i le atunuu nisi e fia talosaga mo ia tofiga i le saunoaga a le afioga Palusalue o le taimi muamua lea ua faasalalau ai e le Malo ia tofiga mo nisi e fia talosaga i ai.
O le taimi a o avea le afioga i le taitai o le Itu agai ma sui faipule o le HRPP ma avea ai ma minisita o le kapeneta, e lei faasalalauina ni tusi talosaga mo ia avanoa, ae sa filifilia lava e le Malo. “O lea ua lelei tele le fuafuaga a le Malo e faasalalau auā o le isi lea aiaiga o le Tulafono o pulega lelei ae tasi lava le tulaga o loo matou faanoanoa ai e lē o amiotonu le filifiliga”.
E iai tagata na talosaga mo tofiga o sui o komiti faafoe a le Malo o sui e lagolagoina le Tautua Samoa ae peitai na faaalia e Palusalue Faapo II e leai ma nisi na filifilia.
O le saunoaga a le taitai o nisi o i latou ia na faailoa atu e lē o filifilia.
Ae na fesiligia e le tusitala o lenei lipoti le taitai o le Itu agai pe o le mafuaaga lea o le faitioina e le latou vaega faaupufai o le faaiuga a le Malo, ae na saunoa Palusalue e leai. “E lē o le mafuaaga lena o le matou manatu, ae e iai tagata e lagolagoina lenei itu sa talosaga”.
O le tasi itu o loo ilitata ai lagona o le itu agai i le filifiliga o ia komiti ona e iai ma sui sa avea ma faipule o le HRPP ua tofia ae sa tatau la ona iai ma nisi sa avea ma faipule sa lagolagoina le Itu agai e filifilia. E lei mafai ona faailoa e le taitai o le Tautua Samoa poo ai nisi o le itu agai sa seei i tofi faipule sa talosaga ae e lē o filifilia e le Malo.
O sui o ia komiti e ta‘i tolu tausaga le umi o a latou konekarate ma e totogi i latou i alauni ua faatulagaina mo fonotaga e usuia a ia komiti. O le faasalalauina o ia avanoa sa aiaia ai e le malo e lē tatau ona talosaga nisi o loo avea ma faipule o le Palemene poo galulue foi i matagaluega ma faalapotopotoga a le Malo. E lē tatau foi ona talosaga i latou sa faamaonia ni solitulafono poo tagata e iai ni o latou aafiaga lē lelei i le itu tau tupe.
