Ua avea le faaiuga muamua o le tagi tau palota a le itumalo o Anoamaa i Sasae e pei ona faamaonia uma tuuaiga o faiga faaalatua i faatosina o le palota na tuuaia ai lē na tagi le susuga Moefaauo Lufilufi ma tuuaiga faasaga i lē sa avea ma faipule, afioga Ala‘iasa Filipo Schwarts Hunt, ma avanoa ua aumai ai ma se tuualalo a le faamasinoga e tusa ai ma le aiaiga o le moliaga o le tauto pepelo le perjury.
Ua aiaia i le tulafono o faigapalota a faamaonia ni tuuaiga faasaga i lē na tagi e na o ia ma ana molimau sa lagolago i ana tuuaiga e molia, ae o lē na faasaga iai le tagi e lē faia se moliaga pe a faamaonia ni tuuaiga faasaga i ai.
O le silasila a le faamasinoga e faaituau ma faailogatagata lea aiaiga o le tulafono, ma ua tapena ai e le faamasinoga se lipoti e tuuina atu i le Fofoga Fetalai o le Palemene e fautuaina ai le silasila toto‘a i lea tulaga.
le a fautuaina ai foi le faia o se suesuega a se komiti faapalemene i lea aiaiga.
E manatu le faamasinoga e tatau ona toe teuteu lea vaega o le tulafono ina ia tau fai molia uma lē na tagi ma lē e faasaga i ai le tagi pe a faamaonia ni moliaga e mafua mai i le faigapalota.
E pei ona silafia o aiaiga nei na faaofi i le tulafono ma pasia ai e le Palemene a o lei faataunuuina le faiga filifiliga aoao a le atunuu i le aso 4 o Mati.
O le vaega 107A o le tulafono o loo faasino i ai atugaluga o le faamasinoga i le faaituau ma le faailogatagata (discriminatory).
E afua ni moliaga faasolitulafono o sē e na te faaulu se tagi o le palota ma ana molimau ona o le tautinoga poo le declaration, e sainia i le taimi e faato‘ai pe faaulu ai se mataupu i le faamasinoga.
O lea tautinoga o loo faaalia ai e lē e ana le tagi ma ana molimau le leai o ni faiga faaalatua e aafia ai pe na latou faia i le vaitaimi o le palota, aemaise lava i le piliota o loo aiaia e le tulafono e tapu ai soo se ituaiga o faatosina faaalatua.
Sa lapataia e le sui faipule o Anoamaa i Sisifo i lona tulaga o se loia, le susuga Fonotoe Nuafesili Pierre Lauofo, sui na tauva i le palota i aiaiga ma aulape o le tulafono o faigapalota.
O se lapataiga na molitai i se auala e faamalamalama ai aulape o le tulafono, peitai e oo ane ina tapunia le taimi e faaulu ai ni tagi, e sefulu mataupu o tuuaiga o le palota na faaulu i le faamasinoga.
O le tuualalo a le faamasinoga o le a molitai i le Fofoga Fetalai, o le a folasia i luma o le komisi suesue o faigapalota lea o le a tofia e le Malo e toe tagai i le tulaga na faafoe ai le faiga filifiliga a le atunuu ua mae‘a.
O le komisi suesue foi lea o le a saunia sana lipoti o le a iai ma ni fautuaga e tuuina atu i le Palemene.