O vaaiga masani pe a mae’a sauniga o le Aso Sa i Samoa

O vaaiga masani pe a mae’a sauniga o le Aso Sa i Samoa

Ua tauau ina galoma atu le pisapisao, i lafoga totogi a faifeau a le Ekalesia Faapotopotoga Kerisiano Samoa ma lo latou teena o le tulafono o le totogi lafoga, ae o se mataupu ua manatu nisi, e tatau ona sagai ane le Ekalesia e silasila toto’a iai, o le faaiuga o le tusigaigoa a le Ofisa o Fuainumera Faamaumauina i le 2016, o loo matuā manino mai ai le tuuitiitia o le aofai o tagata lotu o loo tapuai i le EFKS.

O le EFKS i faamaumauga o loo numera tasi i Samoa, i le toatele o ona tagata lotu, ma e ui ina faamauina le tuuitiitia, ae o loo tumau pea i lona tulaga muamua. E pau le suiga lea ua iai, ua pei o le tifa to i lalo le pa’u o le faitau aofai ina ua mae’a le tusigaigoa o le 2016 ma iloa ai ua lata i le 50 pasene ua faaitiitia ai le faitau aofai o tagata lotu o le EFKS pe a faatusa i fuainumera na faamauina i le 1961.

  O ni faamaumauga e ao ona silasila iai le ekalesia EFKS aemaise o le saoasaoa o le faaopoopoina o tagata lotu a isi lotu poo talitonuga laiti, e ese mai i ekalesia autu e tolu o loo i le tolu pito i luga o le faatulagaga o faitau aofai o tagata lotu i le atunuu.

Fai mai le faaiuga o suesuega a le tusigaigoa o le 2016, o se talafaasolopito faamauina i le Ekalesia EFKS le faasologa o le faitau aofai o ona tagata lotu. O loo manino i faamaumauga, 1961 e 54% le aofai o tagata o le atunuu sa tapuai i le EFKS, ae i faamaumauga o le tusigaigoa o le 2016 ua faamauina na’o le 29 pasene o tagata o le atunuu o loo lolotu pea i le EFKS. O lona uiga, e lē laitiiti le pa’ū o le faitau aofai o tagata lotu o le ekalesia EFKS. E lei mafai ona faamauina ni mafuaaga ua ala ai ona oese tagata lotu a le ekalesia, ona e lei fesiligia i le taimi na faatino ai le tusigaigoa.

“E matou te lē fesiligia le tulaga lena pau lava le matou matafaioi o le faamauina o le faitau aofai” e pei ona saunoa ai le Ofisa Sili o le Ofisa o Fuainumera Faamaumauina le faletua ia Aliimuamua Malaefono Tauā Taaloga Faasalaina. Saunoa Aliimuamua, e le na’o le EFKS o loo pa’ū lona faitau aofai, ua pa’ū foi le faitau aofai o le ekalesia Metotisi.

“O le lotu Metotisi e 16 pasene o tagata o le atunuu na tapuai ai e tusa ai ma faamaumauga o le 1961, peitai ina ua mae’a ane le tusigaigoa o le 2016 ua pa’ū i lalo i le 12.4 pasene, toeitiiti lava a toe maua le aofai na faamauina i le 42 tausaga talu ai.”

Saunoa Aliimuamua, o le Ekalesia Katoliko o loo pa’ū foi lona faitau aofai o tagata lotu pe a faatusa i le 1961. “O le Katoliko sa 21.6 pasene na faamauina i le 1961, i le tusigaigoa o le 2016 ua 18 pasene ua faamauina. Peitai o le Ekalesia o le Aupaia a Iesu Keriso o Aso e Gata ai poo le Mamona, o le ekalesia ua matauina le vave o lona faatupula’ia.

“O lea e matou te valoia o le isi tusigaigoa ua see atu lava i le pito i luga le Lotu Mamona, masalo ona o le vaega lea e tele a latou polokalame e fesoasoani ai i aiga, aemaise a latou polokalame e faafiafia ma tosina atu ai le autalavou.”

Na amata le Mamona e na’o le 6 pasene i le 1961, ae o le tusigaigoa 2016, na faamau ai le oso maualuga i le 16%.

O le faatulagaga i le taimi nei, o le ekalesia EFKS, Metotisi, Katoliko Roma, Ekalesia Iesu Keriso o le Aupaia o Aso e Gata Ai, Assembly of God, Aso Fitu SDA, Aso Fitu SISDAC, Molimau a Ieova, EFIS (Ekalesia Faapotopotoga a Iesu i Samoa), ma le Amazing Love ma faasolo mai ai i isi lotu laiti.

E lei fia faailoa le suafa o se tasi o tina ua liulotu, ae na ia faaalia o ia ma lona aiga, na soifua a’e lava i le ekalesia EFKS, peitai, o amioga faaali ma uiga faasaga i le latou aiga, ua fiu ai. “Matou te lē fiu i meafai a le ekalesia e pei ona tuua’ia e nisi, ae o uiga o tagata ua matou fiu ai.”

E lei fia taliaina foi e se tasi o faafeagaiga Metotisi fuainumera e pei ona faamauina, ona o lona talitonuga o le toatele ua malaga i atunuu mamao, o lana pine faamau o loo finau mai, o le faaopoopo o tupe silia i faigataulaga i faaiuga o tausaga taitasi.