Na lei mafai ona ofi le hall a le Gatapuvae i Magele i le Aso Toonai na tuanai atu nei, i le mamalu o le atunuu o e sa afifio atu e molimauina le faailogaina o le 80 tausaga o le tina ia Mau Fuataga. O lea toatele sa auai ai susuga i faafeagaiga ma o latou faletua, ae le gata i lea o le toatele o le mamalu ma le paia maualuga o le auvalaaulia, o uo ma aumeamamae a le loomatua. O le susuga i le faafeagaia ia Victor Pouesi o le Ekalesia Faalapotopotoga Kerisiano i Magele Sasae sa saunoa i le sauniga lotu ma fofogaina afioga a le Atua e tusa ai ma le faamoemoe. Sa toe faamanatu ma faatauaina e le susuga i le faafeagaiga le alofa le mavae o le Atua Soifua atoa ma Lona faamaoni i le tagata ma le la mafutaga.
O le tina ia Mau e tusa ai ma molimau a le fetalaiga Palaialii Vaueli o se tasi o ona alo, sa tu i le foe ma avea ma fofoga o le aso, na ia taua ai o le tina e iai lona pito Niue. Na molimauina lava i lea aso le faamaoniga o lea tala aua na matua faatumulia le isi itu atoa o le hall i aiga Niue, atoa ai ma susuga i faafeagaiga lea foi sa iai ma le susuga i le faafeagaiga a le Ekalesia Faapotopotoga Kerisiano Samoa i Onehunga, Rev Talagi Naketoa ma lona faletua. Ina ua ave le avanoa e fai ai le sao o nai uso Niue, na matua usi ma le sioa le maimoa a le auvalaaulia ae alo Niue ia latou foi tu ma aga e pei ona masani aso faapea.
O faafiafiaga a alo ma fanau a le tina ia Mau sa matua iloga foi ona aoina lelei, aua e leai se siva na faaletonu. E fai o le mananaia o sauniuniga i faafiafiaga, ae o le aulelei foi ia i teuga e pei ona iai togiga eseese sa fai i lea siva ma lea siva.
I le molimau a le tusitala, amuia foi lenei tina e ui ina e le o atoa lelei le malosi o le tino ona ua poia i gasegase, ae maeu le tapenaina o lona aso faailogaina e pei ona sa nafa ma si ana fanau ma aiga. E leai se mea na gase pe faaletonu aua na pei e nota le faapolokalameina o le aso, atoa ai foi ma le faatautaiga e le fofoga o le faamoemoe. O le tina ia Mau Fuataga e mai le afioaga o Vailima ma Tanugamanono, ae o lona tuaa tina e tupuga mai i Siumu, ae o lona tuaa tama e mai le atunuu o Niue.
E avea ai foi lenei avanoa taua e momoli atu ai ma faamanuiaga a le pulega ma le aufaigaluega a le Samoa Times i le tina ia Mau ma ia manuia lava lou valusefulu tausaga. Alofagia e le Atua ia maua ni isi aso se tele, ma ni isi foi tausaga se tele i le lumanai.
