O le faamanatuina o le Aso Soifua o Lana Afioga i le Tupu Tamaitai o Peretania, Queen Elizabeth II i Niu Sila i tausaga taitasi, e masani ona taualuga i le faaee ai o ni faailoga taualoa mo nisi o tagatānuu Niu Sila, ua iloga a latou tautua i totonu o le atunuu i soo se matātā (New Zealand Order of Merit).
Ma i lenei la tausaga 2015, sa aofia ai ia i latou na faaee i ai nei faailoga taualoa a Lana Afioga i le Tupu Tamaitai, nisi o tamalii o Samoa; le afioga Pulotu Arthur Solomon ma lona faletua o Maretta Solomon, le faletua, le afioga ia Tuiataga Fa‘afua Leavasa-Tautolo, faapea le faletua afioga ia Tagaloatele Professor Margaret Ellen Fairbairn-Dunlop.
O le faletua ia Tagaloatele o loo galue nei i le Auckland University of Technology (AUT), ma na faaee ia Dunlop le New Zealand Order of Merit mo lana tautua faifaipea i le matātā o aoaoga faapea i le tele o isi polokalame fai mo le sologa lelei o tagata Pasefika i Niu Sila.
O le faletua, le afioga ia Tuiataga Fa‘afua Savelina Leavasa-Tautolo, o loo galue o le faatonu lagoago i le Teuila Consultancy, ma na foai atu ia Tautolo le New Zealand Order of Merit, e ese mai foi le isi ona faailoga na maua muamua, le Queen’s Service Medal, e amanaia ai pea lana tautua i le itu tau aoaoga, o tomai faatufugaga ma isi ana auaunaga i komiuniti a le Pasefika i Niu Sila nei.
Mo le afioga ia Pulotu Arthur Gus Solomon ma le faletua ia Maretta Tuasivi Solomon, sa faaee ia i laua nei lava faailoga faapitoa (New Zealand Order of Merit) i le tele foi o laua tautua sa faia ma o loo faaauau pea i le itu tau aoaoga ma isi lava auaunaga aogā mo le Komiuniti a tagata Pasefika o loo autovaa mai i totonu o Niu Sila. O sina talaaga i soifua o Pulotu Arthur ma Maretta. O Pulotu Arthur Solomon, o lona tamā o le palagi ae o le tina o le Samoa mai Malaemalu i Falealili, na fanau i Fiti; ae o Maretta Tuasivi na fanau i le falemai i Tuasivi i Savaii; ona o ona mātua sa galulue aoao fesoasoani i le nuu o Iva, Savaii.
O ona mātua o Fata Eneliko Vaotuua mai Afega ma Anuilagi Perese mai Magiagi ma Fagaloa. O Pulotu o se faiaoga a o Maretta o se tausi soifua. E tele ni pisinisi na aafia ai Pulotu ma Maretta. Sa la faatautaia le faletifaga i le faaiuiuga o le vaitau o le 70 (late 70’s)…sa i Papatoetoe tuai sa ta‘ua o le Central, sosoo ai ma le ofisa malaga sa i Magele sa ta‘ua o le Solomon Travel i le vaitau o le 80’s.
Sa la aumaia (Import) foi le taro mai Fiti…ae faaiu i le faatuina o le aoga a le Martin Hautus Learning Institute, i lona lala i Magele i le 1990, ma faaaogāina (rent) ai foi se vaega o le Maota Samoa (Samoa House) i K’Rd i le 1993-1994.
Na faateleina le numera o tamaiti aoga ma tatala ai se isi lala i Newmarket i le 1995-1997, sosoo ai ma le maota o le Ekalesia Katoliko i Vermont St, i Ponsonby i le 1998. O le tausaga foi lea na tatalaina ai se lala o le Martin Hautus i le aoga a le Katoliko i Logoipulotu i Savaii i Samoa, ae na muta lea auaunaga ina ua tapunia le aoga a Logoipulotu i le 2000.
