O le Aso Toonai 24 ma le 25 o Novema na faailogaina ai e le vaiaai o Porirua i le laumua i Ueligitone le aso e ta‘ua o le Strengthening Families.
O se galuega sa tapenaina e le Komiti o Faifeau ma ta‘ita‘i o le vaiaai i Porirua ina ia faatāuaina lenei faamoemoe mo le tuufaatasia o tagata Pasefika ma faamalosia ai le mafutaga faaleaiga ma faaleekalesia.
Na amata i se solo tele mai Waitangirua e oo lava i le taulaga i Porirua i le taeao lea o le Aso Toonai. O le po na faia ai ni popese a ekalesia eseese e viia ai le Atua. Na faafiafia ai foi le alo o Samoa ma Toga le alii pese ia Ben Makisi, faapea alo o le susuga i le faifeau ia Faatulutulu le alii o Joshua ma lona tuafafine o Grace.
O le aufaipese mataina i lea po o le aufaipese a le Jesus the Way Maker mai Pamasetone, na malaga mai lava i le mamao e ave faatasi le viiga faaleaiga kerisiano o le Atua i Porirua i Ueligitone.
Na matagofie foi le Fofoga o le po na feagai lea ma le susuga i le faifeau ia Pastor Teremoana.
O se po matagofie i le felanulanuai o togiga a ekalesia taitasi ma leo malie i viiviiga o le Atua. Na faapea foi ona toe faaauauina lea i le afiafi o le Aso Sa, i le tele o aufaipese mai ekalesia eseese, na faatasi mai i le sauniga lotu e vivii faatasi ai faaleaiga ma faalefanau a le Atua.
Na auai atu i ai le MP a Mana le susuga ia Kris Faafoi ma le Komesina Sili o le Atu Kuki e lagolago i lea po matagofie o tagata Pasefika.
O le susuga i le faafeagaiga ia Tom Etuata, le faifeau mālōlō mai le ekalesia i St Timothy, na ta‘ita‘ia lea sauniga mamalu ma faasoloina le polokalame o le sauniga.
Na faasolosolo uma faifeau i tiute masani o le tatalo, faitauga o le Tusi Paia ma le laugaina o le Afioga a le Atua na feagai lea ma le Taitaifono o le Perepereane i Ueligitone le susuga ia Perema Leasi.
E toatele aufaipese mālie eseese na lagiina viiga o le Atua mai atumotu eseese o le Pasefika. Na mataina foi le taumafaiga a le tamaitai talavou o Olivia Faatulutulu i lona leo malie faapea ma si ona tuagane o Joshua na taina le kitara. O alo o le susuga i le faifeau ia Faatulutulu ua maoa‘e foi le taleni a ia alo laiti o Samoa i le matatia o le pese.
Ua iai le faamoemoe o le a faailogaina lava lenei aso faapitoa mo aiga Pasefika i tausaga uma i totonu o le aai tele i Porirua, ona o le toatele o tagata Pasefika o loo aumau ma nopia‘i ai.
