Faailoga le 50 tausaga susuga i le faafeagaiga Sepi Paulo

“O le soifua galue ma le valaauina e le Atua aua lona finagalo o se avanoa taua e faigata ona maua.
Ae afai foi e maua, e faigata ona toe faamamulu aua o le valaauina o le tagata e le o se avanoa e sau faalua. Ae pe a oo ina faatauaina lena avanoa ona viia lea o le Atua aua o Ia na Ia aumaia”.
O se tasi lea o vaega na taulai i ai le saunoaga a le susuga i le faafeagaiga ia Sepi ina ua ia molimau i le agalelei o le Atua i lona soifua, a o faatasitasi ai le paia i susuga i faafeagaiga ma o latou faletua, e le gata i lea o le paia maualuga i tupu ma tamalii o Samoa, le mamalu i le auvalaaulia sa faatasi ai i le molimauina o le limasefulu tausaga o le susuga i le faafeagaiga, e pei ona sa faataunuuina i le Town Hall i Papatoetoe.
O le susuga Pastor Tavale Mataia sa saunia le sauniga lotu ma o ia lea sa tomua i molimau o le soifuaga o le susuga Sepi mai lava i le latou mafutaga a o avea le susuga Tavale ma Faatonu o le Autalavou mo Keriso seia oo mai lava i le taimi nei.
Sa saunoa foi ni isi o faafeagaiga sa auai i le faamoemoe ma o latou tautino ai foi i le agalelei o le Atua i le soifua o lana auauna, aemaise ai o lona sao i o latou foi soifua mai lava i le taimi sa o latou uluai mafuta ai seia oo ina autovaa atu ma amataina ni isi o galuega i pitonuu eseese o Niu Sila nei, atoa ai ma Ausetalia.
Na maualuga le afiafi ona o faaaloaloga e pei ona iai faaaloaloga a nai uso Maori, atoa ai ma faaaloaloga mai nai uso Toga. O nei foi tamalii sa aiaina o latou soifua ona o ni galuega lelei sa faatino i ai e le susuga i le faafeagaiga ia Sepi.
Na taualuga le po i faafiafiaga sa saunia lava e alo o le susuga Sepi atoa ai ma lana ekalesia, lea sa faafiafia ai le Aoga Aso Sa, o le Autalavou, Mafutaga Tinā atoa ai ma le siva tele sa faatinoina uma e le Ekalesia lea sa faaiu ai lea foi vaega o le polokalame.
O se tasi o malo faaaloalogia i le po o le aso fanau, o le susuga i le faafeagaiga Esera Leasiolagi, sa malaga mamao mai lava i Melepone Ausetalia ona o le fia auai mai i lenei faamoemoe taua.
O le susuga Esera o se atalii faaleagaga a le susuga Sepi a o iai i Aukilani nei, seia oo ina tuua Niu Sila ma le faamoemoe i Ausetalia e pei ona ua alaala ai i le aai tele o Melepone.
O le maea ai o faafiafiaga sa alo ai loa i faaaloaloga masani aua le aufaigaluega paia a le Atua, atoa ai ma nisi o tamalii taualoa sa fai ma valaaulia i lea po.