Faailoga 21 tausaga o Taliatalosaga Hytongue

O se aso uigaese i le soifuaga o le tamaitai talavou o Talia, ina ua faateia o ia i tapenaga  a nai ona mātua. Na faia le mea sili ona o pelega o fanau i se alo e faasino i le susuga i le faafeagaiga o le ekalesia AOG Itu Samoa i Oxley, le susuga ia Ps Kirisimasi ma le faletua ia Bessie Hytongue o ni lupe faalele a Falefa, Lotofagā Safata ma le faletua ia Bessie Hytongue mai Vaigaga.

 
Sa taitaia le sauniga lotu e le susuga i le Taitai aoao ekalesia AOG Itu Samoa, Susuga ia  Ps Taeauga Ropati Frost e pei ona sa auai ma le faletua ia Saeseese Frost.

 
O le fofoga o le aso o le tofa ia Pitoāmoa Faamanū Lefua ae o le tofa ia Puaasegisegi Numia Pritchard mai Niu Sila sa fai ma sui o aiga na lua auā faaaloaloga.

 
E ese le matagofie o tapenaga a aiga na lua e pei ona faafiafiaina ai le auvalaaulia aemaise aiga uo ma ē sa auai ae sili na mitamita ai le tamaitai o Talia. E lagona ai lona agaga faafetai i nai ona mātua ma aiga.

 
O le tofa ia Tupuola Amoa sa faaleoina se agaga faafetai e tusa ai ma faaaloaloga maualuluga faapea palapala a malo ma le toga paia sa vaaia. Na auai mai nisi o aiga mai Niu Sila, Sini ma Melepone faapea le faletua manumalo ia Tofoitino Lanu (faletua o le taitai aoao ua failagi le folauga).

 
Na ta‘ape fiafia tagata uma auā sa tofusia i manuia faaleagaga ae sili ai le laulelei i taumafa faaletino sa tapenaina e le tofa ia Poulava ma Lona Matautia o le Uncle Sam’s Take Away.
Susuga i le Taitai AOG Itu Samoa Ps Taeauga & Saeseese, Talia Hytongue 21 tausaga ma ona mātua Ps Kirisimasi & Bessie Hytongue ma faafeagaiga ma faletua Taliatalosaga, atoa lona 21 tausaga, ona mātua Ps Kirisimasi & Bessie Hytongue ma aiga uma o ona mātua