Tatala aloaia i Otara Auaunaga Fesoasoani a le Catholic Social Services
Ona o le tulaga moomia o auaunaga fesoasoani mo aiga i mataupu tau lotoifale ma le va nonofo ai, ua a‘e ai se tofa e faalautele ma tatala se auaunaga i le itu i Saute o Aukilani, mo aiga Pasifika ma soo se tasi, e lē faapito augafa foi se fesoasoani i aiga lotu o le ekalesia Katoliko, peitai ua faasafua mo tagata lautele nei auaunaga.
O le Catholic Social Services, o se tautua e fesoasoani faafaufautua mo aiga e fitoitonu i mataupu tau lotoifale, i le va o aiga, o mafutaga faaulugalii, o faigauo, o tagata taitoatasi, galuega faufautua ma faamatalaga mo le tausia lelei o le fanau, aemaise le faafitauli tuga o le sauāina o fanau ma le itupa o tamaitai. Ua faafaigofie ona faatalanoaina faafitauli faapenei, ona ua iai se lala i Aukilani i Saute.
Ua silia nei ma le 90 tausaga o lenei auaunaga fesoasoani a le Ekalesia Katoliko talu mai le 1920, peitai faatoa lesitala faatulafono o se agency mo auaunaga fesoasoani faafaufautua i le 1950, e ofoina ai le fesoasoani mo tagata o loo mafatia i faafitauli tau i faamasinoga.
Peitai ua faalautele nei le galuega, lea ua agai ai mo aiga ma tagata lautele, o le naunautaiga ia feliua‘ina se faafitauli ma avea ma tulaga lelei auā se manuia o aiga mo le lumanai.
Ua molimauina o se tasi nei o galuega fesoasoani o loo ua matuā moomia e le community, pe a faatusa atu i faamaumauga tusitusia o faafitauli tulai mai i totonu o aiga Pasifika ma soo se tagatānuu i Aukilani i Saute.
O le auaunaga Social Work e ofo fua ma e leai se totogi, peitai o loo taliaina lava le loto foai o soo se tagata, e fia tuutuu tau‘au atu e lagolagosua lenei vaega i fesoasoani tau seleni, auā le taumafaiga ma le galulue faatasi mo le lelei o i tatou uma ma o tatou aiga.
O le Aso Faraile o le vaiaso na tea nei na tatala aloaia ai lenei faamoemoe i le Ofisa fou i Aukilani i Saute, i le 14 Otara Road, i Otara lava.
O le sauniga atoa ma le faapaiaina o le nofoaga, faapea le ootiina o le lipine, na nafa lea ma le Afioga Bishop Patrick Dunn DD o le Ekalesia Katoliko.
O le Faatonu Sili o le Catholic Social Services, le faletua o Malia Moeono-Kolio na saunoa i le talaaga o le auaunaga a le Catholic Social Services aemaise ai taimi faigata o le tau amataina o le lala i Otara.
E toatele le auvalaaulia o sui maualuluga ma ē mautofi o le Ekalesia, o sui faipule, e iai le Susuga Su‘a William Sio, Robert Ross le faipule o Otahuhu, faauluuluga o matagaluega o le Malo i Aukilani i Saute, Susuga i faafeagaiga ma le mamalu o aiga ma uo na molimauina lea aso faapitoa.
O se sauniga mamalu ma le matagofie, o se mitamitaga foi lea, ona ua tatala se tasi lala o se matagaluega tāua a le Ekalesia Katoliko o loo ua faauluuluina e se alo o Samoa.
Ua iai i latou ua a‘otauina lelei ma agavaa e galulue i le Catholic Social Services ma o le a faasoa atu le tomai faapolofesa i galuega faafaufautua mo soo se faafitauli o feagai ma oe. E telē le fesoasoani e mafai ona maua i soo se vaega, aemaise o le faaaogāina o le tatou lava gagana e fesootai ai ma faatalanoa se faafitauli i totonu o aiga.
E pei ona saunoa le tamaitai Pule o le Catholic Social Service, “O se auaunaga mo soo se tagata. O le ‘tatou’ service.” Aua loa le nofoai, ae fesootai le auaunaga a le Catholic Social Services i South Auckland: 14 Otara Rd., OTARA, Telefoni 09 2650841.
Mo Ponsonby: 31 Lincoln Street, PONSONBY, Telefoni 09 378 9650.
