E lei atoa se tausaga talu ona faalauiloale tusi o meaai Samoa na tusia e se alii Niu Sila o Roberts Oliver, o nisi o ana tusitusiga i meaai lava a isi foi atunuu ua faaaogā i polokalame i luga o televise, ae o lea ua ofi atu lana tusi faasino ia tatou lava taumafa i se tauvaga faavaomalo.
E lima tusi o meaai ua aofia ai ma le tusi i taumafa Samoa, o le a faia i ai le faamasinoga i se tusi e maua le faailoga muamua i lea tauvaga, ma o se isi lea o matati‘a ua taunuu i ai lenei taumafaiga ua faalauiloa ai foi ma lo tatou atunuu.
O se faalauiloa lelei foi mo le atinae o tagata tafafao mai i Samoa auā o le isi lea o atinae o loo aogā tele i ai le tusi i meaai a le atunuu. Fai mai le alii o Roberts ua lagona lona faagaeetia ina ua ausia lea tulaga i se taumafaiga sa galulue ai ma nisi e pei o le pulega o tagata maimoa mai i Samoa ma le Faalapotopotoga o Tina faipisinisi a Samoa le Samoa Women’s in Business.
O le afioga i le Palemia susuga Tuilaepa Lupesoliai Sailele Malielegaoi, o se tasi o loo lagolagoina le tusi lenei i lona tapenaina ma le mae‘a e pei ona faaalia ai sona finagalo tusitusia i le amataga o le Tusi o Meaai Samoa.
O se isi lea mafuaaga e pei ona faaalia e Oliver o le tulaga ese o le tusi i taumafa a Samoa, ma o se itu sili foi ona vave apo ma amanaia ai e pei ona sao atu i se tauvaga o tusi meaai faavaomalo.
Na amata ona masani ma iloa e le alii o Oliver Samoa, ina ua malaga mai ona mātua ma faatū le faalapotopotoga o le YMCA poo le Young Men Christian Association i le vaitau o le 1980.
O lea aumau ai i Samoa o le alii ma ona tuaa na ia silafia ma iloa ai le tele o meaai a le atunuu e fiafia i ai o tatou tagata. O lana foi lea tusitusiga ia tatou taumafa ua faasino tonu lava i fua o laau e maua i Samoa e aogā tele i le soifua maloloina pe a gaosia ai a tatou lava taumafa.
O se itu lelei foi mo le lagolagoina ai o le tautiga o le au faifaatoaga i Samoa o loo atinaeina le laueeleele i soo se fua o laau tau faatoaga ma o se alatupe lelei tele foi lea mo latou pe a faatau fua o latou faaeleeleaga ma faaaogā e gaosi ai a tatou lava meaai e lē soona manaomia ai taumafa a isi atunuu o loo faaulufale mai i Samoa.
O se luitau foi lea mo pisinisi fale‘aiga ma faletalimalo i Samoa o le saunia o a tatou meaai ma faatau i tagata, auā o le molimau a le Palemia ina ua faalauiloa le tusi lenei i le tausaga ua mavae, a agai i se faleaiga ae fesili atu pe maua se vaisu o le tali e leai.
O lea la ua iai nei se taumafaiga a le faalapotopotoga o tina faipisinisi o Samoa e atinae ai le au faifaatoaga laiti e totō fua o laau‘aina mo le gaosiga o meaai auā o se tupe lelei foi mo latou auā le tausiga o aiga ma isi fuafuaga fai masani.
Mo le Tusi o Meaai Samoa o le a tatou tapuaia pe sola ma Samoa ma le faailoga muamua.
