Faailoa malaga Air Pasefika mai Apia i Honolulu

Ua sauni le kamupani vaalele o le Air Pasefika a le atunuu o Fiti e faalautele mai lana auaunaga tau femalagaiga i Samoa i le faia o ni ana malaga i lona alavaa fou mai Apia i Honolulu i Hawaii e amata i le aso 11 o le masina o Setema o le tausaga nei. O ananafi na faalauiloa mai ai e le alii pule sili o lea kamupani vaalele o John Campbell lea faaiuga a le pulega o le Air Pacific, i le naunautaiga o le kamupani vaalele e siitia lana tautua. O se tala fiafia lenei mo le Malo o Samoa i le atinae o tagata tafafao aua o lea ua iai le isi avanoa e afea ai le atunuu e tagata turisi tafafao mai Amerika, talu ai o loo nofo popole pea i le faamuta o malaga a le kamupani vaalele o le Air Niu Sila o loo tautuaina malaga mai Apia i Los Angeles i vaiaso taitasi. I se pepa o faamatalaga mai le Air Pasefika ua faaalia ai o se tasi o ona vaalele 737-800 o le a tautuaina malaga i le va o Apia ma Honolulu, lea e tele nofoa o le a maua ai avanoa mo tagata e fia malaga i lea alavaa. O se tala fiafia foi mo Amerika Samoa, aua o le isi lea alavaa e mafai ona faataunuu ai faigamalaga agai i Honolulu.