O se tasi o suafa iloga i taaloga mai Avele, Moataa, Vaivasetai ma Laulii ia Sevani Ikenasio Faoagali ua sauni atu nei e faatauina ia Iuni le CD muamua na ia tusia mo lona alo tamaitai ia Tele Sulutupe Faoagali i totonu o Melepone.
O le taimi nei ua suafa matai ia Tapunuuolenuu Tupuola Paulo Faoagali, ma o ia o le uii o se fanau e toasefulu e na o le toatasi si o latou tuafafine. O latou mātua o le Afioga Tupuola Kasio Faoagali mai Siumu ma Poutasi Falealili faapea le tina ia Akenese Suega Faoagali o Vaivasetai, Poutasi ma Manunu.
Ua maupaolo nei ia Ataata mai Laulii le alo o Tuialii Sua Faofua ma le tina ia Sina Tuialii Sua Lupesoliai Uelese mai Aufaga. E toaono o la alo ma e toalima tama ae toatasi le teine na fananau i Samoa le toatolu, ae toatasi na soifua i Niu Sila ae toalua na ola i Melepone talu ona siitia mai i le 2008.
E pei o aiga uma na tuua Samoa i le 2005 mo se lumanai manuia i atunuu mamao, ma o le taunuu mai i Meadows Height i Melepone ua toe fafagu ai taleni a mātua e ala i le fanau.
O le tina ia Ataata sa avea ia ma tamaitai pese i le opera a Samoa i le tausaga 1994-1995 i lalo o le taitaiga a le tina ia Titi Sapolu Grey ma le afioga ia Manuleleua, sa faauluulu i ai le aoga musika i Malifa i lena vaitau, ma o le tina sa faiaoga o ia i Samoa i Leifiifi Intermediate i Malifa i le tausaga 2000 ina ua faauuina mai i le iunivesite o Samoa i le Papaigalagala.
Ua tapenaina nei e le tamā ma le tina ni pese ma fati e usuina e lo la alo tamaitai e toatasi ia Tele Sulutupe (14) Faoagali ma o se suifefiloi o pese faaleagaga, pese Samoa ma fatuga mālie.
O Tapunuuolenuu sa filifilia i le ausoka Siamupini a Vaivasetai i tausaga e tele, faapea aulakapi a Moataa. O se sui foi o le U19 a Samoa na malaga i Niu Sila i le 1994, Samoa Colts i le 1997 ma filifili i le au Soka a Samoa i le 1994 mo le Ipu a Polenisia. O le tausaga lava lea na filifilia ai foi lona uso matua ia Pasikale Faoagali i le Manu Samoa.
O Tapunuuolenuu na sainia foi sana konekarate i Inglewood Taranaki ma sa taalo lava ia Moataa Marist St Joseph Samoa, Vaivasetai, ma sa faiaoga foi i le ‘au a Laulii Lion i Samoa i tausaga a o lei malaga mai i atunuu mamao.
O le ulumatua e sefuluono tausaga ia Faofua Ikenasio Jr, Paulo Ingelwood, Tele Sulutupe, Pasitale Johnstone, Samiu Melbourne ma Suasina Josephus Nicholas.
Saunoa Tapunuu o lenei CD ua mafai ona faataunuuina ona o le lagolagosua a le afioga ia Sila Levae sa pueina ma faatonutonuina ua faaigoaina ‘O lo‘u Faauuina’ o le igoa o le pese sa ia tusia i le vaitau o le avea o i laua ma tiakono i tofiga a lo latou Ekalesia EFKS i Northcote i mātua faaleagaga ia Rev Aviti Etuale ma le faletua ia Sa.
Sa faaalia e le tiakono ia Faoagali o lagona na oo ifo ia te ia na afua ai ona tusia lenei pese, ina ua faaoo foi lagona i le tamā faatonu ia Rev Aviti Etuale ma le ekalesia i se tofi tiakono e fia faia, ma sa ioeina ae faatali le filifiliga a le pulega sa faatalitali se faaiuga i ae ua osofia loa le fatupese i lagoga ia o loo tusia ai lenei pese i le popole ma le fefe.
Sa fesoasoani foi le susuga i le faifeau i le faaliliuina o nisi Pese. O se tasi o aualofa i lenei CD e manatua ai ma momoli ai o matou moomooga ma valevale alofa i tamā ua faiilagi le folauga ia Rev Vavae Toma sa tapueiga o latou ola faaleagaga a o latou laiti i si o latou nuu o Vaivasetai i le pese ua faaigoaina “‘Ou te lē Faatali Se‘i Matua Ona ou ava ai lea.”
O le pese na tusia e le tamā ia Rev Vavae Toma ma Avoia ma o loo usu nei e Tele Faoagali.” E momoli ai foi ma o matou alofaaga i si o matou nuu i le faafeagaiga ia Rev Peteru Tone ma le faletua ia Sieni aemaise le autalavou, aoga Aso Sa, “Ao Alo Mai Pea Lau Folauga Toeitiiti taunuu lau faigamalaga”, o le pese sa tusia e le uso tiakono ia Samiu Paulo Tupuola ae usuina e Tapunuuolenuu.
O le Pese faapitoa o le Eseta “E mo A‘u Nei”. E iai foi le pese ma viiga 138 i le tusi pese “‘E Lou Tama e, ua faafeai”, o loo usuiga e le tina e aualofa atu ai mo nai ona mātua ma lona aiga uma i Laulii Samoa, Niu Sila ma Ausetalia.
