Na faatumulia James Meehan Hall i Macquarie Fields lea na faafiafia ai Alii pese iloga mai Niu Sila ma Samoa o Joe Failua ma Tala Pauga.
O le faamoemoe o le faailoaina o se ofisa Malaga o le Aqua ua faatautaia e nisi o tamalii o le atunuu i le tuatusi 5/33-35 Hamel Rd i Mt Pritchard. O le tamaitai Pule ia Sita Leilua na saunoa, “Talu ai le fesili pea o le mamalu o le atunuu i lea auaunaga na amata faia ai tapenaga ma sailiiliga poo moomia lava lea tautua.”
E ui o le faaaogāina e nisi o le upega tafailagi mo femalagaaiga, o loo moomia pea e le toatele le feutagaiga ma tagata fai pepamalaga o si tatou atunuu. “E fiafia lava le Samoa e talanoa ma le isi Samoa e uiga i Malaga i Samoa ma Niu Sila aemaise nai tina ma tamā matutua. O le avanoa foi lea ua latalata ai lenei auaunaga i tatou tagata i pitonuu o Fairfield, Liverpool ma Cabramatta.”
O le isi vaega e lelei ai lenei tautua fou o le avanoa pea i fesili mo pasese ma latou tau i soo se taimi e tupu ai ni faalavelave. E lē gata o lea tautua i le ao ma le po ua mafai foi ona togitogi pasese mo fuafuaga mamao.
“Ua silafia o nai tatou tagata e feagai ma le mau faalavelave ma o se faamāmā avega lea,” o se faaliga lea a Sita.
Talu lava na tatala lenei taumafaiga i le vaiaso talu ai ua toatele le atunuu e valaau mo pasese toatele ma fuafuaga mamao i le tausaga fou i le 02 8783 5857.
O le isi auaunaga e fiafia i ai tagata o taamilosaga lakapi a Niu Sila ma le Manu Samoa. Na fetaui tonu lenei Siva a le Aqua ma le manumalo a le Manu ia Uelese 26-19.
O lea lava po na vaaia ai le toatele o le mamalu o Samoa i Sini na laei i le togiga a le Manu e aualofa ai foi i lenei manumalo maoa‘e. Na tofu le tagata na auai ma le pepa faalauiloa a le Aqua.
Na faailoa foi le lagolago a le toeaina Faatamā o le Asosi Sydney Samoa Media afioga Leau Matautu, Semi Lynch o le Leitio Samoa o le Fofoga Moomia, Fata Pati o le Laumua Talalelei, Lealaifola Lauvale Su‘a o le Samoa Laalaa ma Tagaloa Seiulu, Elaine Autagavaia o le Samoa na Galo, ma Leilua Jerry Uesele o le Samoa Sportstar.com.
