Ua uma ona asiasi le susuga ia Tuilaepa Reupena Kovati i le Aoga Amata a Leataata Pre School i North Shore e vaavaai ma faamatala i fanau laiti le totōina ma le tāua ma le aogā o fualaau’aina i le soifua o tagata.
Ua lē gata la i fanau aoga laiti ae ua silasila ai foi mātua ma faiaoga i le saili malo o alo ma tamafanau o Samoa o lea ua oo lo latou suesuega i le tāua o fualaau’aina.
O le fesoasoani sili lea ua mafai ona faailoa le tomai ma le iloa o tamalii o le atunuu i lea vaega o le soifua maloloina o le tagata ae le gata i lea o le faatāuaina o mea o loo i le siosiomaga o le tagata na aumai e le Atua.
Pei ona faamatala e Tuilaepa Reupena Kovati e tele le fesootaiga o le palapala ma le tagata ae afua foi lea i le faatāuaina o mea totō poo fualaau’aina o lea ua aumai e le Atua e tausi faalelei ai le soifua o le tagata ina ia ola maloloina lona tino. O le tagata na fausia mai i le palapala, ae o le palapala foi o loo iai le tele o minerale o loo mafai ona fesoasoani i le tino o le tagata. O le auai atu foi o Tuilaepa i le aoga a Leataata Pre School ua faailoa ai i tamaiti o le fualaau’aina e lē totōina i totonu o faleoloa, auā o le mafaufau o tamaiti aoga o fualaau’aina e gaosi mai i faleoloa o loo faatauina mai ai, ae ina ua ia auai atu i aoga ma faamatala le tāua o fualaau’aina ma lona totōina ma ua avea ai o se lesona lelei i fanau lenei polokalame mo latou i le lumanai. O le manulauti sili ona faatāua i totonu o polokalame nei, ina ia mafai ona matamata tamaiti i le totōina o fualaau’aina e pei o le tamato, kapisi a’o la foi e aai ai i fualaau’aina ia latou te totōina ae sili ai ona latou iloa lelei foliga o fualaau’aina lea o loo latou totōina. Ma o se auala pito sili lea ona tāua i le a’oa’oina o fanau, ia faatino, ia iloa ma faaaogā.
O le tele o Aoga Amata o loo tufa fua iai le tele o fualaau’aina mai faleoloa ma isi fai faatoaga auā le soifua maloloina o fanau aemaise ai o le faatāuaina e fanau o le aai I fuaaau suamalie (fruits) ma fualaau faisua (vegetables).
O le aoga a Leataata Pre School ma le aoga tulagalua a Mangere East o loo mafai ona auai mai ai le afioga ia Tuilaepa Reupena Kovati ma faasoa iai le tāua o fualaau’aina i le soifua o le tagata. O Leataata Pre School ua faalua nei foi ona asiasi i le faatoaga a le susuga ia Tuilaepa ma latou molimauina ai lenei tamalii o se tagata e toaga tele e fai le faatoaga mo le soifua maloloina o tagata. O loo tele faleoloa i totōnu o Aukilani o lea ua faatauina mai iai le faatoaga a le susuga ia Tuilaepa Reupena ua fesoasoani ai i lona aiga aemaise o lona atunuu ma le Pasefika.
