Ua lē iloga se mailei e faaaogā e tagata gaoi ma le au solitulafono, e faataunuu ai a latou gaioiga leaga ma le solitulafono.
E tele mea ua aliae i nei aso, o loo faaaogā e kegi ma tagata gaoi, e faavevesi ai le mafaufau o se tagata ma lē sagatonu ai lona mafaufau, peitai e iu ane ua faanoanoa ia tagata, ae ua sosola le au gaoi ma ni ana mea aogā aemaise lava tupe, pe oo lava foi ina faaoolima i nai tagata lē sala.
O nisi foi nei o metotia poo auala poto leaga ua faamaonia mai le faaaogā e nei tagata i lenei foi vaitaimi. O mea e tatau ona tatou nofouta i ai, aemaise lava foi o i latou o loo faafoeina taavale i le tele o taimi.
Ta‘ua i se pepa o faamatalaga na tuuina mai ai lenei lipoti, o nisi tagata leaga e tele ina lalafi mai tua o ni vaivao i vaipanoa o le auala e tau leai ni fale o iai, ae faatagā faataatia se nofoa pepe poo nofoa o fanau laiti i totonu o taavale.
E ono vaaia o loo saofai mai ai i lena nofoa se pepe, peitai, aua nei faateia oe ma faafuasei ai fua ona tu lau taavale.
E lē o se pepe moni. O le mea tonu lena o loo latou mananao e tupu, ia tu lau taavale, aemaise lava nai tina ma tamaitai, e oso vave le alofa faatina i le pepe ma manatu ai o se tamaititi ua tiai i le auala, ona tu lea se‘i siaki ma vaai, peitai o le taimi tonu lena e osofaia ai oe, ae lē i se gaioiga faaoolima, poo le gaoi o au mea totino.
Afai o se tamaitai, o le a latou tosoina i tua i le vaivao, ma faaoolima matagā i ai, seia oo lava ina toe tiai ai le auala tele ua uma le ola.
O le lapataiga malosi: ‘Aua lava ne‘i tu lau taavale. Vili le 111 ma ta‘u i ai le mea o loo tupu i le auala’ ona tuu lea e taulima e latou ae faaauau pea lau malaga.
O le isi mailei fou lea ua faia e isi tagata aemaise i taimi o le po, e faafuasei ona togi ane se fuamoa mata ma ta‘e pipisi i luma o le fa‘ata o lau taavale.
O lou popole tele e te ono faapasī ai se vai i le fa‘ata ma faaola au salutimu e salu ese ai. Peitai e lē faigofie lena faiga, auā afai e mili faatasi le vai ma le sua o le fuamoa, nai lo le toe matafi vave ese, ae o le a atili ai ona nenefu lau fa‘ata ma poloka ai le toe mafai ona e iloa atu se mea i le fa‘ata. Lona uiga e iu loa ina tu lau taavale, i lou mafaufau e sili ona e oso lelei i fafo se‘i fufulu mamā le tioata, peitai o le taimi tonu lena mo tagata leaga ma le ‘au gaoi e osofai ai oe.
E moomia ai lava ona tatou matuā mataala ma ia aua ne‘i faateia oe ma e gaioioi loa e tali atu, ae ia mafaufau toto‘a ma vili leoleo i le 111 mo le latou fesoasoani, ae aua ne‘i e mafaufau e te fia taulimaina se faalavelave ua tulai mai.
O nei tagata e leai se mea e toe taofia mai ai a latou gaioiga lē alolofa ma le manatu faapito. Manatua, ‘E sili le puipuia nai lo le tau togafitia!’
