E tele ina lē anoanoa le tulaga o iai vaomatua o le atunuu ona o le manatu, o loo iai i latou e faatinoa lea galuega. O ā lava suiga e agai mai ma i latou, o le tulaga foi lea e mulimulitai i ai le lautele o le atunuu. O lea mafaufauga ua suia, ona e lē o toe saogalemu Samoa ma le aotelega o lona siosiomaga i suiga ogaoga o le tau. O lea foi ua matauina le matautia o le utiuti o le suavai ua mafai ona faasoa atu i le atunuu. O lea la ua iai nei se fesoasoani ua faagasolo i afioaga eseese o Samoa, ua valaauina ai le sao o tagata o afioaga uma. O i latou e ana vaomatua, o i latou foi e tatau ona galulue faatasi ma le vaega o vaomatua ma le suavai a le Matagaluega o Puna‘oa ma le Siosiomaga, i le puipuia o nei vaega tāua o le atunuu.
Ua tolu lelei aoaoga ua faia e le Matagaluega mo sui ua filifilia o nuu ina ia mafai ona o latou faitau faafanua ua tuufaatasia e le matagaluega, ia manino ai i tuaoi o nuu ma vaomatua o loo iai aemaise o le iloa o puna‘oa faanatura o loo i totonu o eleele o lea nuu ma lea nuu ma faasao e mafai ona faamalosia ai. O le tele o vaomatua o Samoa ua ta i lalo ona o le faamamā lea o fanua mo maumaga ma togafa‘i ae ua lē vaavaai ai le mamalu o le atunuu i le faaitiitia ai o le suavai maua mai i le soona ta i lalo o laau tetele nei. Ua solo ai le eleele ma faaleaga ai vaitafe o loo sau mai i le vaomatua. Ua sola ai le tele o manulele ua faapea ona ofaga i laau tetele nei ma ua taalaelae le tele o nofoaga ua faigofie ai le faaleagaina i taimi o afa fulifaō.
O le aoaoga la o le vaiaso na tea nei, na aoao uma ai faigata nei aemaise o le faataatiaga o le vaomatua i afioaga e pei o Nuusuatia, Lotofagā ma Vaiee o le atu Safata. O sui o afioaga nei sa faatautaia i ai lenei aoaoga. Ua mae‘a aoaoga faapea i afioaga mai i Laulii e oo i Falevao ma afioaga o Iva e oo i Faga i le Faasaleleaga i Savaii. A mae‘a lenei aoaoga ona agai lea o sui o afioaga nei ma le faataatiaga ua iai faafanua o vaomatua ma talanoa i pulega a alii ma faipule ma le nuu, o tamaitai faapea le malosi o le nuu i ona tupulaga, ma o iina e agai ai loa afioaga e faamamalu tapu o le puipuiga ma le pulea lelei o vaomatua. O le isi tulaga o le faamalosia ai o le faamamā ma le puipuia o vaitafe, vaipuna ma ālia i totonu o fanua o nuu ina ia mautinoa le maua pea o le suavai i augatupulaga fai mai.
E tāua tele lenei taumafaiga e pei ona ta‘ua e le Matagaluega o Puna‘oa Faanatura ma le Siosiomaga auā o tagata lava o afioaga e manuia ai pe a puipui lelei o latou vaomatua ma faasao atu ai ma manulele ma isi meaola o le vaomatua. O le tupe ua faatino ai le tuufaatasia o faafanua ma faatino ai aoaoga ua aumai i le faalapotopotoga e nafa ma le faalauiloa o puipuiga o le siosiomaga a le lalolagi le GEF (Global Environment Facility) ma le lala o atinae a Malo Aufaatasi le UNDP (United Nations Development Program).
