I se tasi o tala tau logologo mai le tatou iunivesite aoao, ua amata nei ona faia faalauiloa a le pulega o le iunivesite aoao a le atunuu e faatatau i le mafuaaga ma le autū o lana sailigatupe faaletausaga o le a faalauiloa aloaia i le aso fitu o le masina fou, lea o le a tatala i le malelega mai lana afioga i le Ao Mamalu o le Malo, Afioga Tuiatua Tupua Tamasese Efi.
I se pepa o faamatalaga faalauiloa o loo faaalia ai o seleni uma o le a mafai ona maua o le a tuusa‘o lava lea i le atinae o le iunivesite aemaise le itu tāua o le aoaoina o alo ma fanau o le atunuu.
O soo se tasi e iai sona sootaga ma piitaga i Samoa e mafai ona faia sana foai amata mai le lima afe e oo i le sefulu afe, ma ua iai aiaiga e mafai ai ona ausia ni seleni tetele e tuuina atu.
Faaalia e le pulega o le iunivesite o faaiuga o tausaga taitasi o le a saunia ai se lipoiti e silafia ai e i latou o le a mu loto e faia ni foai poo fea tonu o loo faaalu i ai a latou seleni, ma o le a tapena foi le iunivesite e faia se tali faaaloalo mo i latou.
O le amatalia o lea fuafuaga saili tupe ua amata faatau ai pepa mo se fiafia e maua ai taumafa ma vaiinu eseese e 250 tala a le tagata e toatasi, poo le lua afe tala i le laulau mo tagata e toavalu.
O le taitaifono o le komiti filifilia mo lea faamoemoe o le afioga Au‘ava Dr Lake Ah Chong ua ia faailoa e faapea, talu ai o se faamoemoe tāua o le iunivesite lea faaputugatupe, ua tuusa‘o ai le fuafuaga i soo se tagata Samoa i le atunuu ma fafo atu o Samoa.