Faailoa aganuu Pasefika e le Liki Cabramatta

Na vaaia le tumutumu o le malae o le Kalapu Lakapi liki a Cabramatta i sini i le Aso Toonai mo le faaaliga o Siva ma Pesepesega a atunuu uma o loo taaalo a latou fanau i lea kalapu iloga. O le Sini o le aso faapitoa o le ‘Ola Soifua Maloloina ma Agaifanua’ (Cultural & Healthy Living Day).

O le Cabramatta Leagues Club o se tasi o kalapu ua atagia ai le maualuga o fuainumera o fanau Samoa, Toga, Fiti, Maori ma le Pasefika o loo resitara ai ma o le nofoaga lava e faafoeina le tauvaga taitoaiva (Pacific Cup Nine’s) i tausaga uma ae lei amatalia le taamilosaga o le tausaga auā e maua uma i le Cabra Leagues atumotu uma.

O le Aso Toonai na aofaga potopoto uma ai atumotu eseese ma faia Siva a atunuu taitasi mai le taeao i le 8.30 seia oo i le aoauli auā le maimoa a mātua ma tagata lautele.

O le malae autū na faia ai foi taaloga faasamasamanoa. Mo le fanauiti na iai taaloga na faafilemu ai foi aemaise puega ata ma le susuga a Hazem el Masri na taalo muamua mo le Bulldogs lea na avea ma malo faaaloalo.

Na matagofie siva Samoa na saunia e fanau e pei ona auai ai foi sui o le Toa Samoa i lalo o le sefulufitu tausaga. O le malae lava lea na koleni faatasi ai ma le Toa Samoa a o sauni atu mo le taaloga ma Toga.

E manatua ai pea i lea malae a le Cabramatta Leagues le Toa Samoa ia Alex Elisala lea na vaaia mulimuli ai e le mamalu o le atunuu i lea toleniga ma le Toa Samoa ma sa feiloai atu ai foi i tagata lautele a o lei maliu.

Na atagia foi i lea aso le toatele o taleni fou ua sauni atu e saili avanoa mo ‘au sinia a Cabramatta. E pei ona silafia o lenei kalapu e ui atu ai tama mo le ‘au tele a Parramatta Eels.

O se kalapu foi ua faafaileleina suafa iloga e pei o Jarryd Hayne, Josesph Paulo ma le auso o Keating. E lē taumate o le tausaga fou e sainia ai foi nisi fou e Parramatta.