O tala faamaualuga ma upu faifai a le alii fusu o Shane Cameron lea sa fai ia David Tua, e ui ina e fai si mamafa ma le tiga, ae sa toa pea le tai i le alo o Samoa sei vaeane paia i le suafa o le alo fusu o le atunuu.
E talitonu le tusitala e leai ma se isi na lei lagona le alofa ia Tua i le tele o nei mau upu faalele ma faataitaiga o le oti o Tua i le maea e pei ona olopalaina ai o ia i upu a le pulega ma le alii fusu o Cameron. Peitai o le po o le Aso Toonai lea na tea nei, na toe totogi uma ai e Tua nei tala ina ua fepaiai i totonu o le maea.
Ai lava o le mea tonu lea e tau o le fasi faamoamoa, aua o lea lava na silamio le atunuu ma le lalolagi ae fai faiga a le tama Samoa i foliga o le alii tauluilui.
Na manatu le toatele o le a faigata le fusuaga, peitai i lena manatu, sa toatele lava na o latou tapuaia le susuga David Tua i lana faamoemoe.
I le nofoaga sa faataunuuina ai le fusuaga, sa maua le avanoa e faatalanoa ai le toatele o i latou sa auai, ae leai lava ma se isi sa faatalanoaina na auese sana tapuaiga.
E tasi lava le igoa, ua na o Tua. Ia atili ai foi i le vaai mai o ofu atu le ofu Samoa, ma isi e ula a latou ulafala, ua fai lea ma faapogai o le savali atu lava i lea itu tauvalaau mai papalagi ma tau mai le igoa o Tua, Tua, Tua, ua na o Tua lava.
Taimi a o lei amataina le fusuaga
I fafo o le fale poo le nofoaga sa faia ai le fusuaga na matua iloga ona pisa solo talanoaga ma leo tetele e uiga i lenei fusuaga.
O le itu foi e malie ai, ona o se faapotopotoga e pei e toa sefulu ma sili atu ae a tuu tuu atu lota taliga e fia iloa le auga o le talanoaga, ae tasi lava le autu, o Tua. E faaleai nisi na talanoa ma sei tau ave ni manatu lelei mo Cameron.
E peiseai sa mafuli lava le tapuaiga ia David ma o ina foi na talitonu ai le tusitala, o le matua toatele lava o i latou o loo tumau pea le latou talitonuga o loo iai pea lava le malosiaga ia Tua, ma e lei taitai lava ona faaono litaea mai le maea.
Fusuaga
E le toe tau faailoina ni manatu i le itu lea aua na tautala lava aao o Tua i le faatinoga o le taaloga. O le amataga o le taamilosaga muamua na iloa lelei ai lava le iuga o le taaloga. E moni i le tali atu o Cameron i nai soa muamua a Tua, ae na oso loa le isi pomu a o lei atoa se minute o le taamilosaga muamua, iloa loa iina le afu malulu o le alii Cameron. O le lua minute talu ona faagasolo le taamilosaga muamua ae faalogo atu Cameron o le mea ese lea la te faafesagai.
Ai lava na iai i manatu o si alii e faigofie ona ia tali taliina Tua, ae faalogo atu, e taunuu ai upu a le faafafine vaeane le mamalu o le aufaitau, “E ese a le malovale ese le malo tiaa”.
E toe afa minute ae uma le taamilosaga muamua ae o le taimi tonu lea ua tuulafoai lima o Cameron aua ua fai lava si malolosi o aao o Tua. E oo lava foi i le laufali ua leiloa poo le a le mea o le a fai. E fai o le taulotoina o le tulafono o le fusuaga, ae masalo ua tei ina ua faalogo atu e tui Cameron ae saviligia atu ai ma nai ona autaliga ona o le malolosi tele o aao o Tua.
Ia o le pona lena ua leiloa e le laufali poo le mea ea a faitau upu pe o le a le isi mea o le a fai, ae oso faalava ane loa ma le logo sefe faalelei si alii o Cameron, ae semanu lava e uma i le taamilosaga muamua.
E amata le taamilosaga lua ae maua atu i le vaai, ua pula lava le tino o si tama o Cameron. Atili ai la aua e na ona amata lava o le taamilosaga lua ae faaaoga uma loa ma le agavale ma le taumatau a le tama Samoa, ia e faalogo atu Cameron, aue ua sau a le oti.
E sefulu tolu lelei soa ma tui a Tua na tau i le tino ma foliga o le alii o Cameron ae leai lava ma se tali atu, o le faailoga lena o le lei taitai ona matua le mafaufau o Cameron e fusu i luga i tama matutua.
Tapuaiga a le aumaimoa
O le taimi na savali mai ai Tua i totonu o le maea na tulai tagata uma ma feei e faailoa lo latou fiafia ma faafeiloai atu i le savali mai o David. Ua atili ai ona fiafia ma alalaga ane tagata aua e faaleo mai e lana savali lona faaaloalo.
O lona loto alofa ma lona loto maualalo. O le mea lava lena e ese mamao ai Tua ma le afe o le lalolagi o tama fusu o loo iai nei.
E talitonu foi le Tusitala, o ona uiga ia o loo teufatu pea e tagata, ma atili ai lava ona fiafia tagata e lagolago ia te ia. I le taimi na savali mai ai Cameron, masalo na pau lana uo na alaga ane ia te ia o le leotele o le pese lea sa ta a o savali agai ane i totonu o le maea. Ae o le taimi foi lea ua feei mai tagata i le ituaiga o ala faaamuamu isi tama o Cameron, o le faailoga o le leai ma se isi e fiafia ia te ia.
Na molimauina foi e le tusitala le maualuga o le tapuaiga a Samoa i lea po. O tina ma tama matutua, o tupulaga ma fanau ua matua masii atu uma le falasiigata a le atunuu.
O isi na taunuu lava i le nofoaga na fai ai le fusuaga e lei taitai le aso, ae o le toatele na taunuu atu i le afiafi pe tusa o le a ta le ono.
Na lagona le ootia a o lei amataina le paga a Tua, ina ua tulai le susuga Lapi Mariner o le alo pese lauiloa o Samoa ma lagi le pese e momoli ai faamaisega mo Samoa ma aiga o loo aafia i galulolo e pei ona feagai ai ma le atunuu i le vaiaso ua tea. Na maea lea ona sosoo lea ma le vii o le atunuu, o se taimi na vaaia ai le maligi o loifofoga o le toatele o le tapuaiga a Samoa.
O le a le isi laasaga mo Tua
O le taimi nei e le o manino mai le isi laasaga mo Tua aua o lea o le a galulue nei lana pulega ina ia taumafai ina ia iai ni isi ana fusuaga i se taimi vave e pei o le masina o Tesema. Ae o le moemitiga ma nei gaioiga o le a faataatitia e le pulega, o le taumafai lea ina ia vave maua mai se taimi e toe fusu ai Tua i le fusi o le lalolagi i se taimi lata mai.
O le fusuaga a Tua na ia toe tau atu ai i le lalolagi atoa, e lei mate le lamepa a le Tama Samoa, ae ua atili ai ona mumu saesae.
O isi sa manatu ua matua le alii o David, peitai o lea ua faamaonia e Tua i le po o le Aso Toonai, o loo tumau pea lona uumauina o le malosi e faatino ai le taaloga.
E iai le manatu o le a toe lolofi mai nei nisi o alii maualuluga o loo faatautaia fusuaga e toe aputiputi atu Tua aua o lea ua vaavaai mai, ua sili atu le malosi lea ua iai David nai lo le mea sa iai muamua.
Sa fesiligia e le au tusitala Tua ina ua o latou feiloai mulimuli ane pe o le a sona manatu o loo i le isi ona laasaga. Ae tali le alii, o loo tumau pea lana moemitiga mo le fusi o le lalolagi.
Ae o le a tuu pea i lana pulega e gafa ma le itu lea. A o ia, o le a lava le mea o le iai o lena lava. O ai foi e fia fusu ia te ia, o le a ia talia lava e fuafua i luga o maliliega ma tuutuuga o mea nei o fusuaga.
