E lima vaiaso sa tatau ona faagasolo mai ai le suega siamupini a le QRUSA (Queensland Rugby Union Samoa Association).
O le lua vaiaso talu ai na lē mafai ona faataunuuina ni taaloga lakapi ona o tulaga faaletonu o le tau sa lē mafai ai ona faaaogāina le malae.
O le Aso Toonai la, aso 23 o Oketopa na faamae‘aina ai loa lenei taamilosaga tele i le aai o Browns Plain i Brisbane lava, ma na matuai faatumulia i le autapuai.
E 8 ‘au sa faapea ona tauva i lea taamilosaga faitaulia.
Pei ona silafia o ipu e 2 o le Open ma le Under 20 lea o loo faamafana ma afifi mai i le Setete nei o QLD mai taaloga faavaomalo a le tafatolu i le tausaga ua mavae sa faia i Melepone.
O le uluai tausaga lenei ua ofi mai ai le aai o New Castle i faalagamaea o le taaloga lakapi i totonu o Ausetalia nei.
O le iuga la lenei o taaloga a le QRUSA i le Aso Toonai ua tuanai 23 o Oketopa.
DRAW:
Fasitoouta v Saleimoa
manumalo Fasitoouta
North Star v Brisbane Barbarians
manumalo North Star
Falealupo v South Barbarians
manumalo Falealupo
Logan Samoa v Marist
manumalo Logan Samoa 38 – 29
Ua siamupini nei le Logan Samoa i lenei tausaga i le taamilosaga a le QRUSA ma ua se‘ia mai ai le talita sa umia e le Marist i le tausaga ua mavae.
O le auga la o aute o le taamilosaga a QLD lava ia i tausaga uma, ina ia fili mai ai ni tama taaalo mataalia e tauaveina le igoa o Kuiniselani auā le taamilosaga ma Sydney, Melepone ma Brisbane faatasi ai ma New Castle (interstate).
Ua iai le faamoemoe o le Aso Toonai 30 o Oketopa o le a faia ai lea taaloga tele i New Castle.
O le Head Coach, susuga ia Faalafi Pa Enari o le a taitaia le malaga atu a tama i New Castle faatasi ai ma le Peresitene o le QRUSA – Pi Vagava ma le Failautusi – Auvaa Kosena, faapea le komiti ma le au malaga atoa.
O tou māmā na QRUSA, manuia le tou alofaiva!
