A o tālia pea le auina mai o se tala poo afea e mautinoa ai se aso e falelauasi ai nai aiga na maliliu faafuasei i le afi, ae matuai maofa le loto i le agaga fia fesoasoani o tagata ma faamafanafanaga mo nai aiga o loo ufitia pea i le ao pogisa.
Talu lava ona lē maua se to’a i nai tagata Tonga faapea nai aiga Samoa, e lē faapea ua mapu ai talosaga tuufaatasi a le Au Tonga faapea foi Samoa lava ia.
O le isi itu, e faafetaia pea le Salvation Army ona o la latou galuega mae’ae’a i le tapenaina lea o taumafa i soo se taimi.
O le po o le Aso Faraile, aso 2 o Setema, na matuai leai se ofi o le hall a Glenala High School i le lolofi atu o alo ma fanau aoga faapea soo se tasi e faafeiloai le tofa ia Faalafi Ieremia ma si o latou aiga, faapea le aiga o le susuga Taufa.
O le aoga lea sa a’oa’oina ai alo o Faalafi Ieremia ma le faletua ia Neti, sa o latou valaaulia faapitoa mo se latou sauniga tuufaatasi ae solo mai le tele o aoga tuaoi, e lē gata i teufugalaau a o seleni paia.
O le Aso Toonai i le itula e 3 i le afiafi, na osia ai se Misasa tuufaatasi a Tonga ma Samoa i le malumalu a St Pauls Parish. Sa taitaia lea sauniga paia e le Afioga ia Patele Epati Tamati o le taitai o le puleaga Katoliko a Kuiniselani.
Na faatumulia i le auuso mai Tonga, faapea papalagi ma soo se lanu e aofia ai ma Samoa. Na talifetalia’i Tonga ma Samoa i le lagiina o viiga, na mataina foi le logomalie i lea aoauli a o ufitia pea nai aiga i faanoanoaga. Sa aoina ai le taulaga ma tuuina aloaia atu e lana Afioga ia Patele Epati i le tamaitai o Treicee Taufa.
Na faafetaia e Treicee le tele o faalapotopotoga ma Ekalesia ona o le agaga fia fesoasoani ua lagona ai le loto tetele ma le mafanafana o si o latou aiga, aemaise o upu faalaeiau mai ana auauna paia.
