O le vaiaso lenei e faagasolo ai mataupu laualuga o le Fono tele i Malua a le Ekalesia Faapotopotoga Kerisiano i Samoa. O nisi o mataupu laualuga o le fono tele e aofia ai le unai ua ave pea i le atinae o aoaoga aemaise o le faaleleia o auaunaga i le ofisa e pei ona iai le Lomitusi ua tuufaatasia ma le Faletusi o le Ia Malamalama ma ua suia nei le Pule o lea nofoaga a le EFKS i le susuga ia Lafi Esera ua sui tulaga i se tasi o faafeagaiga sa vaaia le Lomitusi, le susuga Sapati ma Mayalondre lea ua valaauina e tausi nuu i le afioaga o Sili i le motu tele i Salafai.
O le faauuga o faafeagaiga ma o latou faletua e to‘a 21 i le faaiuga o le vaiaso na faamautu ai a latou galuega faafaifeau i le mae‘a ai o le lua o tausaga o tautua faatausinuu. Na aofia ai i le aufaauu le susuga ia Sapati Iopu Tima ma lona faletua. O lea na oo mai sui o le aulotu fou lenei ua faaopoopo i le Ekalesia mai i le nuu o Magele i Sasa‘e (Mangere East) i Aukilani.
O le tausaga muamua lenei o lea aulotu ma o lea ua faamautu mai lo latou manaoga ina ia fai ma se tasi o sui o le EFKS i lea itu o Niu Sila ma o le Aso Toonai na se‘i mavae atu nei na molimauina ai se feiloaiga a sui o lea aulotu atoa ai sui o le EFKS e faamaonia lo latou ofi mai i totonu o le Ekalesia.
O le aulotu fou lenei i Magele i Sasa‘e o aiga ua o latou faatūina o se vaega o se aulotu sa i lalo o le Ekalesia Faapotopotoga Kerisiano a Amerika Samoa. Ua faaauau lava le aulotu lea e i lalo o le EFKAS ae o lea ua vaea ese nisi o sui o lea aulotu ma ua faatū ai le aulotu fou lenei ua foi mai i Samoa nei mo le faaauau ai o lo latou piitaga i le ekalesia.
O le tausaga fou la faatoa faamautu ai loa ona sui usufono i lenei Fono tele ae o le tausaga lenei ua mafai e ona sui ona molimauina le tulaga o le faagasologa o le fono tele i Malua ma mataupu laga mai i lea matagaluega ma lea matagaluega.
O le faaiuga o le vaiaso na faatautaia ai feiloaiga a pulega ma matagaluega eseese ma na faatautaia ai foi ma se afiafi o faafiafiaga a matagaluega eseese e pei ona felanulanuai ai le malae i Malua i faafiafiaga o siva ma pese faa-Samoa.
O le fono tele mo tina na faatautaia i le vaiaso ua tea faatasi ai ma isi fono a komiti eseese a le Ekalesia. O le vaiaso la lenei ua faagasolo ai nei le Fono tele ma o le itu tau i aoaoga lava ia ua faaalia e le Failautusi Aoao o le Ekalesia Rev. Dr. Iutisone Salevao, o le a faapea ona faamatuu atu i ai se tinoitupe e $4 miliona tala mo ana atinae.
O le taimi lenei e lē o toe iai se vasega 13 tele lea sa tuufaatasia i Vaisigano ae ua faaauau lava le Vasega 13 i kolisi a le lotu e pei o Tuasivi i Savaii, o Leulumoega fou, Malua fou faapea ai Nuuausala.
