E 21 moliaga ua molia ai nei i luma o le Faamasinoga ni tagata se toafitu ona o ni tauaiga maa na faaleagaina ai le maota o le aiga o Faumuina Tutuila i Tanugamanono.
O lea faalavelave na tulai mai i Tanugamanono i le aso 2 o Oketopa o le tausaga na tea nei lea ua alia‘e mai ai pea se feeseeseaiga i le va o lea aiga ma le afioaga o Tanugamanono.
O i latou ua molia nei, o Patrick Ivi, Pili Ropati, Faaniniva Ropati, Apelu Faailo, Keleka Tolai atoa ai ma le 16 ma le 17 tausaga e lē mafai ona faailoa o la suafa ona o le matutua o loo iai nei.
Mo le silafia o i latou uma nei, e mai le afioaga o Tanugamanono ma na iai i le taimi na tulai mai ai le vevesi i Tanugamanono.
O moliaga e 21 na folasia i tolaulauga a le itu a leoleo e aofia ai moliaga e 6 o le tauai maa, 7 moliaga o le umia o aupega matautia, 6 moliaga o le faaleaga meatotino, 1 le moliaga o le faalavelave i tiute a leoleo ma le 1 le moliaga i le lafoina o upu taufaamata‘u.
O le moliaga o le faalavelave i tiute a leoleo ma le moliaga e tasi o le lafo o upu taufaamata‘u o loo faasaga tonu lea i le alii talavou 16 tausaga lea e taofia le faalauiloaina o lona suafa.
E 14 molimau a le itu a leoleo ma malu o le malo e toatolu lea na nafa ma le suesueina o lea mataupu o loo molimau mo le itu tagi. O le aiga o loo tagi o le fanau lea a Faumuina Tutuila, lea o loo tea ma le afioaga ma o loo nonofo i Vaitele i le taimi nei.
Ua mae‘a le iuga o le Faamasinoga o Fanua ma Suafa i le va o le aiga ma le afioaga ina ia toe foi le aiga i Tanugamanono ae e oo mai i le taimi nei e lē o talia lava e le nuu. I le molimau muamua mo le mataupu i le faaleagaina o le fale o le aiga o Faumuina Tutuila na ta‘ua ai e Afu Faumuina Tutuila i luma o le Faamasinoga e faapea, e lata i le $200,000 tala le tau aofai o meatotino a lona aiga na faaleaogaina ai i lea tauaiga maa. “Na ta‘e ai le faitotoa pito i luma o lo matou fale, faaleaga ai le laulau‘ai tioata, tulaga o le tv ma le tv, o faamalama, a‘u ipu atoa ai ma meafale mataetae na faaleaogaina atoa,” o le molimau lea a Afu.
Na ia ta‘ua foi, na taei ai ma tioata o taavale a lo latou aiga na tutu i totonu o lo latou fanua i lea tuuaiga maa.
O se tasi o molimau tāua a le itu a leoleo o le molimau lea a Nosi Faumuina Tutuila, o le uso lea o Afu sa iai uma faatasi ma lona toalua i le taimi na tulai mai ai le faalavelave.
Na ia ta‘ua i lana molimau, na faalogoina le togi e le tagata o le maa i luga o lo latou fale ma o lea na la tuliloaina loa ma lona toalua ma na manino lelei lana vaai o le toatasi o i latou e toafitu. Na ia ta‘ua foi, e lei poi ia taulelea o ia o se tamaitai auā na taofiofi o ia e le tasi ae tu‘i. Ua mae‘a fofogaina uma molimau a le itu a leoleo se‘i vaganā ai molimau a le Itu tetee e oo mai i le taimi o a tatou lipoti e lei mae‘a lava ona faagasolo molimau o lenei mataupu.
O lenei faamasinoga na faapea ona agai lelei lava le Afioga i le Alii Faamasino, Lesatele Rapi Vaai ma sui o le Faamasinoga ma itu e lua e asia le maota o le aiga o Faumuina Tutuila ona o le fia malamalama atili o le Alii Faamasino i le nofoaga lea e tulai mai ai tagi poo moliaga nei.
O se auala e saga faamanino ai i le Alii Faamasino le solitulafono lea ua tuuaia ai nei sui o le nuu.
