E iai ni masini ua ta‘ua o robots o le sami ua faapalasi ane nei i le laina o le ekueta (equator) i tala ane o Kiripati – ma o ni masini ua fesoasoani i tagata suesue ma saienitisi e suesue taaviliga o le sami i taimi o le tau vevela ma taimi o afā ma timuga lea lava e amata mai i ogasami o le Pasefika.
Ua faapipii i nei masini ni telefoni satelite ina ia vave ona fesootai ane soo se suiga o le sami i le nofoaga o vaa ia ua fesootai i ai ma ua faamautu ai le au suesue.
tele lava ina sailiili le vevela fesuisuiai o le ogasami aemaise o isi faamatalaga e iloa ai le amataga o afā, e iloa ai le amataga o nisi suiga tetele i ogasami o le Pasefika.
E 32 atunuu o le lalolagi ua faia ai nei suesuega ma ogasami tetele uma ma masini nei e 3000 ua faapea ona faapalasi solo i ogasami eseese auā nei sailiiliga.
O se auala o le a vave ai ona maua faamaumauga i le tulaga o iai suiga ogaoga o le tau i ogasami.
O Samoa le isi atunuu e aofia ai i suesuega nei a ia masini, ma o tausaga ua tea e ta‘i 10 tausaga faatoa mafai ona maua mai ni faamaumauga auā sauniuniga a ofisa o le siosiomaga ma ofisa o faigafaiva e faatatau i le tulaga o iai le vasa Pasefika, ae ona o le tomai i masini nei aemaise o telefoni tau satelite ua faapipii ai, ua mafai ona maua mai nei faamaumauga i aso taitasi ma agai loa i ai i latou e faatinoa galuega fesoasoani ma le laveaia o faaletonu o ogasami e faatino a latou galuega.
E taifā tausaga ma suia nei masini, ae o le itu faigata lava lenei o ogasami uma o le lalolagi, o le Vasa Pasefika, le ogasami aupito tele i le lalolagi, ma o le ogasami e malolosi tele foi galu – e pei foi ona molimauina e i latou ua faagasolo nei galuega i autafa o Kiripati ma luga o le ekueta.
O le tāua o nei faamaumauga o le a mafai ona maua ai se taimi e tali atu ai atumotu o le Pasefika ma ana paaga tetele i ni suiga ogaoga e tatau ona mataala i ai.
Ua tele faalavelave tetele faalenatura ua vaaia i tausaga ua tea, ma ua mafua mai i le sami – o le faamoemoe o nei suesuega ina ia maua lava le taimi e tali atu ai le tagata i suiga ogaoga o le tau e tau laveaia ai ni soifua i le lumanai.
