O se faamoemoega lava lenei o le Ofisa o Aoga ua leva ona fuafuaina ma faasalalauina, peitai e lei foliga mai lava o iai ni suiga.
O le ala lea sa toe fetuutuunai ai fuafuaga ina ia sui le tulaga o auaunaga a le matagaluega, ia vavalalata le fesootaiga ma aoga, matua, ma tagata lautele.
O le masina o Aukuso na amata ai lenei faamoemoe i Aukilani i Sisifo, sa auai sui Pasefika o le ofisa i Aukilani i se fonotaga sa valaauina ai faifeau o ekalesia eseese o le Pasefika o lea faaitu. Faaalia le agaga fiafia o sui o le ofisa ona o le talia fiafia o so latou finagalo e le gata i susuga i faafeagaiga, ae faapea foi i matua.
Ua toe amataina ai nei nisi o polokalame mo tamaiti o le Tausaga 1 – Tausaga 6, o le faaaogaina lea o le gagana muamua a le tamaitiiti, e faaleleia ai le faitautusi ma le tusitusi i ekalesia Tonga e lua, ma le ekalesia EFKS i Mt Roskill.
O lenei polokalame sa amataina i le tausaga e 2005 i aoga e lua i Aukilani i Saute, o le tulagalua a Wiri Central (Gagana Samoa), ma le tulagalua a Te Papa i Onehunga (Gagana Tonga).
Ona sosoo ai lea ma le polokalame Niue oloo faatinoina i le tulagalua a Favona i Magele, ma le isi polokalame i le Gagana Samoa sa faatinoina i lalo o le faamalu a le Sosaiete a le Samoa Atiae i Magele, i le tausaga e 2006.
O le tausaga e 2010, na tuuina atu ai loa i le EFKS i Magele, le susuga i le faafeagaiga ia Victor ma le faletua ia Salome Pouesi.
O se tulaga lelei tele lea ua faaofi i totonu o ekalesia, ina ia fesootai ma polokalame faatino a aoga Aso Sa ma autalavou, ina ia matuā faaleleia ai le malamalama ma le tomai o alo ma fanau i le faitautusi ma le tusitusi, mo le agai i luma o le taumafai o le fanau i totonu o aoga.
O se tasi vaega taua o lenei faigapaaga ma fesootaiga ma sui o le Ofisa o Aoga, ua matua faamalamalama atili ai le tele o vaega taua o aoaoga a le fanau e pei o le NCEA, i le taua o le lelei o maka e maua pe a oo i le faaiuga o le Tausaga 13, ona e tele ai avanoa e fai ai filifiliga.
E le gata i lea, o le filifiliina o mataupu, ma tapenaga a matua ma aiga e lagolago ai le taumafai o le fanau.
O nei auaunaga a le Ofisa o Aoga, oloo ofoina i soo se ekalesia, ma soo se faalapotopotoga ina ia malamalama lelei i le tulaga o le faagasologa o iloiloga ma le suesueina o fanau i laasaga eseese o le taumafai.
E matua taua tele nei faigapaaga i le siitia ai o lagona o le manumalo o le tamaitiiti, ma faaosofia ai lagona o le fia aoaoina, aua ua amanaia ma faatauaina lana gagana, o se tasi o alagaoa poo auala e faaleleia ai le agai i luma o lona aoaoga.
O le toatele lava oloo manatu o le Gagana Faaperetania e taua, peitai o nei polokalame ma nei talitonuga oloo faavae i le tele o suesuega ma faamaumauga, i le taua o le gagana muamua a le tamaitiiti mo le faaleleia o lana gagana lona lua, mo le agai i luma o lona aoaoga.
E le gata i lea, o le atinaega o le tamaitiiti atoa, i le tino, mafaufau, agaga, va fealoai ma faalogona.
E le mafai ona atinae le atamai, pe a le o faatasi ma le atinaega o faalogona, ma isi vaega uma.
