O Janelle Filo Mano o se tamaitai talavou na faamanatuina lona 21 tausaga ia Tesema i le tausaga talu ai, 2012. Ae pagā lea, o le vaiaso lava na sosoo ai talu ona mavae le faamanatuina o lona aso soifua, na faateia ai lenei tamaitai talavou ma si ona aiga i Aukilani i Saute, ina ua faailoa i ai e fomai a o asiasi atu i Middlemore Hospital, o ia ua aafia i le gasegase o le kanesa e ta‘ua o le Leukemia!
O se avega mamafa ma le tiga i le faalogo ona o ia o se tamaitai e talavou lona soifua, ma faatoa uma atu ona faamanatu lona aso fanau i lona 21 tausaga. O le Leukemia o se kanesa lea e maua i totonu o le toto poo le cancer foi o le toto, e mafua mai i totonu o ponaivi.
Na vave ona amata togafitiga a fomai i le faia o le chemotherapy i le vaiaso lava lea na iloa ai ua aafia i le kanesa, talu ai le malosi ma le vave tele o le tutupu o sela o lenei kanesa.
E lei mae‘a ona faaauau togafitiga i le chemotherapy e pei ona amata, talu ai ua afaina lona fatu i le malolosi o vailaau sa faatino ai ona togafitiga.
E faigata le tulaga ua iai lenei tamaitai, ona ua amata ona faateteleina le malosi o le kanesa ae pagā lea ua leai se togafitiga e toe mafaia e fomai ona ua lē toe mafai e lona fatu ona tatalia nisi vailaau sa taumafai e tapē ai le kanesa.
Sa faitau le afioga Toaletai David Tua i le tala faanoanoa a lenei tamaitai i luga o le facebook, ma sa talosagaina foi e nisi uo le susuga David Tua mo se avanoa na te faamalosiau ai ia Janelle ma lona ma‘i, ma na taliaina e David Tua le talosaga atu mo se avanoa ma lona loto fiafia tele.
O le po la o le Aso Faraile na tea nei, sa feiloai ai Janelle ma David Tua i le Gym a Tua i Onehunga. O se vaaiga fiafia ma le faafetai na vaaia i foliga a Janelle ina ua faateia o ia, ina ua feiloai ma David Tua ae na te lei iloaina lenei fuafuaga.
Na vaaia foi loimata maligi o Janelle a o talanoa ma le susuga ia David Tua. O se faamatalaga a Tua, o ia ua maua sona malosiaga tāua mai ia Janelle. Sa saunoa Daivd o le fusuaga o loo sauni atu i ai, ua na o se fusuaga faatauvaa ma faigofie, pe a faatusatusa atu i le fusuaga o loo fai nei e Janelle ma le ma‘i o le kanesa.
“I am inspired by your strength and your positive spirit. You have given me the strength and a strong mind set towards my comeback fight. Your fight is a fight worth fighting for because you are not fighting alone.
We are all fighting with you! Never give up and even if giving up is the only option when you feel down. Just stay positive and NEVER GIVE UP.”
O saunoaga ia a le susuga ia David Tua i le tamaitai o Janelle. Sa momoli le faafetai a le susuga David ia Janelle ona o lona loto tele ma lona loto finau ua fai lea ma faamalosiau ia te ia.
E lē gata i lea, o le avanoa ua ia fesoasoani atu ai e ala i sona foi faamalosiau ia Janelle ma lona tauivi ai ma lenei ma‘i matuiā. O loo taumafai nei nisi togafitiga e tauala mai vai faalenatura, ona ua leai lava se togafiti o toe mafai ona faia e fomai.
Na saunoa le afioga ia Toaletai, o loo taumafai lava e tele sona tami avanoa e fesoasoani atu i le tatou community Samoa.
