E lē iloa poo le faafugaga aupito taugata lea ua molimauina i Samoa – ia ae faigata leaga o le Palemia o le atunuu lea na faafuga le lauao.
O le mafuaaga o se tupe mo galuega atinae a le Sosaiete o le Kanesa i Samoa.
E foliga fa‘atu lava si Palemia ina ua agai atu i le vaiaso na tea nei, ae ua matuā tumu le nofoaga o loo iai lifi o le fogafale lima e agai i lona ofisa. “Ou te lē iloa poo le ā le mea ua tumutumu mai ai fua nei tagata,” o lana faamatalaga lea.
“O le tala lava na fai atu ae o lea ua agai uma mai,” na soisoi le taitai o le malo ma nofo ifo loa i le nofoa ua i luma o le laina nofoa ua tumutumu i taitai o le atunuu e molimauina le faafugaina o lona lauao.
O se tauofoga na valaaulia ai le toatele o sui maualuluga o le Malo ma Pule Sili o Kamupani ma Pisinisi i totonu o le atunuu.
O le tuutuuga o le faafugaga o le lauao o le Palemia e na o le 25 minute ua ave ia “Dr John” o se alii ‘oti ulu lauiloa i le taulaga o Apia e faafuga ai le lauao o le taitai o le malo.
O le tupe lava e maua i le taimi lea o le tupe lena e ave i le Sosaiete o le Kanesa.
E to‘a 28 isi na faapea ona mae‘a faafuga o latou ao i le lua vaiaso ua tuanai ae na faaiu i le alii Palemia leaga na malaga i fafo i galuega faalemalo.
Faapea la le Palemia e pei ona faasegagui solo ai ana faamatalaga i le agai mai e faafuga lona ao, ai ua galo ia – ae e leai ni galo – na solomua i kamupani telefoni feaveai a le atunuu le agai ane e amata tuuofo i tupe e faafuga ai loa le ao o le Palemia.
Sa iai foi le sui o le Tautua Samoa – ma le latou $1000 ina ia mautinoa e faafuga le ao o le Susuga Tuilaepa.
Na amata le taumafaiga ae vaaia loa le amata agai atu o kamupani ma le mamalu o le atunuu e tuu atu siaki tupe i lea faamoemoe ma o totonu o le 10 minute ua sili atu i le $20,000 ua maua – tu i luga le alii Palemia o le a talai ese le ie sa ufiufi ai ona laei ae toe vaai atu e lei lava se tupe, toe saofai ifo i lalo ae valaau e lē lava le tupe.
Mae‘a le 25 minute ua oo atu i le $80,000 tala le tupe ua aoina. E fai o le puupuu o le taimi ae o se tupe tele ua maua mo lenei faamoemoe sa leai se manatu o le Sosaiete o le Kanesa i Samoa e oo iai taumafaiga i lea aso.
“Na ou faapea e le toatele faapenei nisi e omai ma lagolagoina foi le faamoemoe a lenei foi Sosaiete ma o le a lē otia lo‘u ulu ona o so‘u manao ae mo nisi foi o le atunuu ua aafia ma pagatia foi i lea faama‘i ,” o le saunoaga lea a Tuilaepa.
E lē masani ai ona faia ni faamoemoe faapenei e taulamua ai le Alii Palemia se‘i vaganā ai ni tamoega poo savaliga i se mamao faatulagaina e mo sailiga seleni a nisi foi o faalapotopotoga.
Peitai o se tasi nei o vaaiga na mālie i le toatele na molimauina lea vaega ma talasua ai nisi foi o tamalii o loo umia tofiga faipule ma o loo faafuga foi faapei o le ao o le Alii Palemia o latou foga.
“O lo‘u talitonuga a sele le lauao o le tagata pe poo foi ona atili ai lea ona mamalu ma e leai foi se sui o le Malo na au uma i le tofiga Palemia e lei pupuu faapenei lona laulu.
Na tele lava faatusatusaga a le Alii Palemia i le Ao o le Malo i le taimi nei, Afioga Tuiatua Tupua Tamasese Efi.
“E ese le aulelei o le Ao o le Malo i lona lauao ma ua atili ai ona maualuga le tulaga tamalii ma le mamalu o le vaaiga a tagata ia te ia ma o le talitonuga lava lea o le atunuu e tatau lava ona oti faapupuu laulu o alii”.
Na ta‘ua ai e le sui o lea Sosaiete, susuga Leiataua Daryl M Clarke o le faamoemoe lenei ua atoa ai nei le vaiaso talu ona amata ma e tusa ma le $107,000 le tupe na maua i le sailiga tupe na faia i le aso ua ta‘ua.
“E momoli atu le faafetai ma le faamalo ia i latou na lagolago atu foi i lea aso, ma e to‘a 26 alii ma tamaitai e toalua na faafuga o latou ao.
E le gata foi e lea o le faafetai i le Afioga i le Alii Palemia ona o lona taliaina o la matou faatalauula atu,” o le saunoaga lea a Leiataua.
E mae‘a ane lea faamoemoe ua tusa ma le $182,500 le tupe atoa na maua mo lea lava Sosaiete, ma ua fuafua foi e faaleleia ai nisi o vaega o le Maota gasegase i Motootua mo togafitiga aemaise ai lava le totogiina o nisi o vailaau ma mea faigaluega o le faaaogāina.
