O le Aso Toonai 6 Aperila sa faataunuuina ai le Faafouina (Professional Learning and Development (PLD) a le SAASIA (Sosaiete Aoga Amata i Aotearoa) mo Aoga Amata i Aukilani e faatatau i le TAPASA. O le autū o ia faafouina o le tusi mai le ofisa o aoga e ta’ua o le Tapasa Pacific Cultural competencies.
O lenei Faafouina sa faafoeina lava e sui o le Komiti Faafoe a le SAASIA i Aukilani nei i lalo o le taitaiga a le afioga i le Peresetene Aoao poo le Taitaifono le afioga ia Sala Pafitimai Dr Faasaulala Tagoilelagi Leota. O le auvaa o folasaga ma faasoa o le susuga ia Sofaea Penn, Lila Tekene, Irene Paleai-Foroti, Tuifaasisina Lanuola Moe-Penn ma le afioga ia Funemalafai Dr Ripa Silipa.
E sili atu ma le 50 faiaoga faatasi ma Pulega mai le 21 o Aoga Amata eseese na mafai ona auai ma faafofoga i lea Faafouina i le iunivesite a le AUT. O nisi foi sa auai o faletua o faafeagaiga aemaise le lagolagosua a le faafeagaiga malolo ia Matavai Alefaio. Sa faaalia le agaga fiafia ma le loto faafetai ona o le ‘oa ma le tamaoaiga o le gagana ma le aganuu sa mafai ona faasoaina i lea aso. E le gata i lea o le lu’itauina pea o faiva o faatufugaga a faiaoga o Aoga Amata i le tāua ma le tulagaese o le gagana, aganuu ma le faasinomaga o tamaiti Samoa.
I le Aso Toonai ua mavae 13 Aperila sa toe faaauauina ai foi lenei Faafouina i le Iunivesite lava a le AUT. O lenei Faafouina sa faasoaina i le gagana peretania mo faiaoga o Aoga Amata mai isi atunuu o le Pasefika. Sa auai ai sui mai aoga a Niue, Tonga, Rarotonga faapea foi ma Samoa. Sa manaia le fetufaaiga i lea aso ona o le felanulanuai ma le aanolasi o le tofa faasoa o gagana ma aganuu mai isi atunuu o le Pasefika. O le agaga faafetai o sui mai isi atunuu o le Pasefika ona o le sao o le SAASIA i le toe lalagaina ma le toe timataina o le tāua ma le aoga o le gagana, aganuu ma le faasinomaga o tamaiti Pasefika. O vaega tāua uma ia o le TAPASA o loo faamamafa mai e le Ofisa o Aoga. O le TAPASA o se tasi o Taiala mai le Ofisa o Aoga e faatatau i le a’oa’oina ma le atiina’eina o tamaiti Pasefika.
O le manulauti ma le auga o aute lea o nei faafouina, ina ia malamalama atili faiaoga o Aoga Amata i le uiga ma le aano moni o lenei foi Taiala auā lava le faafuluina o fanau Pasefika. O le faamoemoe maualuga lava lea o le SAASIA e tusa ai foi ma lana anava tauave, ina ia mauaa o tatou tamaiti Samoa i la latou gagana, aganuu ma lo latou faasinomaga.
O galuega o lenei tausaga o nisi o faafouina e galulue faatasi ai le SAASIA ma le ofisa o loo iloiloina polokalame a aoga poo le ERO Education Review Office. O loo tapena foi lana fono fava o malo poo le International Conference e faia i le NUS poo le iunivesite i Papaigalagala i Samoa ia Setema. I le taimi nei ua iai le ofisa a le SAASIA i Magele ma o loo taumafai atu mo nisi galuega e fesoasoani ma tautua ai i aoga amata.
