E ui i le felanulanuai mai ma le matagofie o fausaga faaonapo nei, o suiga fou i meaafale, peitai e le taitai lava ona mafai ona faamaopoopoina se ipu omea ua ta‘e ma se fatu ua nutimomoia. E alu aso sau foi aso e le galo ma matū loimata o se mafutaga motusia.
I le savalia ai o le valu masina talu ona faatama‘ia i sauaga a le afi le fale o le alii Tonga o Tau ma maliliu ai lona auaiga e 11 e aofia ai ma le faletua o Faalafi Ieremia Lale ia Neta ma si ana fanau e toa 5, na toe molimauina ai se suiga ese i le tulai mai o le fale i se vaaiga fou.
E moni o loo fou totoga o le fale peitai o le fausaga lava na finagalo Tau Taufa ma si ona afafine o Tracey e toe fau ai lo latou fale e pei ona silasila atu i ai. E na o le 8 vaiaso sa toe fausia ai le fale ae maea ona o le agalelei o le tele o kamupani sa lagolago. O le faamoemoe lea sa faataunuuina i le taeao segisegi o le Aso Tofi a o lumanai le faamanatuina o le Eseta i le aai lava o Slacks Creek.
E pei ona silafia talu ona tupu le faalavelave sa faamautu lava le susuga ia Tau Taufa ma si ona afafine i le fale o loo faafesagai, ona ua sifi ese le aiga sa iai i le latou fale. O se fiafiaga lea ia Tau ona e le fia alu ese ma le nofoaga na aveeseina ai lona auaiga.
E 40 kamupani sa fesoasoani malosi i le toe fausiaina o le fale, ae 150 le augalulue sa tele ina ofo fua o latou taimi e aunoa ma se totogi mo le galuega tele.
O le Konekarate fai fale ale BLF (David Hanna ma lana aufaigaluega) sa taulamua i le fausiaina o le fale ma e na o le 8 vaiaso ae maea le galuega.
O le tele o meafale ma le faatotogaina sa mafai ona ofo fuaina mai e le tele o kamupani faapea foi le kalapu a le Phat o loo iai le tamaitai o Tracey, o i latou nei sa vaevaemo‘emo‘e i le tele o le manaomia, mai lava i le faatoa tupu o le faalavelave seia oo mai ina tu le fale ua maea ona fausia.
E oso a‘e le la i lea taeao o le Aso Tofi ua faatumulia le nofoaga i le aumaimoa faapea aiga ma uo aemaise o le tele o malo faaaloalogia na mafai ona molimauina lea sauniga. Sa molimauina le lava tapena o le malu taeao faapea vaiaiga o le aoauli mo i latou sa auai.
O le tauaaoina o ki o le fale na ta‘ua ai e Tau sa ia lagonaina pea e ala i le Agaga Paia le mafutaga ma ona aiga ma e le mafai ona galo.
Ua faamoemoe o le aso 15 o Aperila o le tausaga nei lava, o le a faamanuia ai ma faapaia le fale e se faifeau Tonga ona faatoa mafai lea ona sifi atu Tau ma Tracey e nofoia lo latou fale fou.
