O Puepuemai Asolelei Alafaapae Uaine (sulu le siapo itu taumatau) mai Niu Sila, o Puepuemai Tolufale Alaifaiva Tema mai Hawaii (itu agavale), o le susuga Tooa Puepeemai Salometaioaanamatuamasaga Peteli (ogatotonu)

O Puepuemai Asolelei Alafaapae Uaine (sulu le siapo itu taumatau) mai Niu Sila, o Puepuemai Tolufale Alaifaiva Tema mai Hawaii (itu agavale), o le susuga Tooa Puepeemai Salometaioaanamatuamasaga Peteli (ogatotonu)

O se taeao manino ma le lagilelei ina ua suluia i ave o le la si o matou afioaga i Vailoa Aleipata i le taeao o le Aso Lua, aso 29 o Ianuari 2019 ina ua faafotutupu le Alo o le Tuiatua le susuga i le Aomavaega le afioga ia Puepuemai.

O se faamoemoe sa tulimatai pea e le afioaga aemaise foi o nisi o i latou ua lausilafia le faapogai ma le mafuaaga o loo ponatia ai pea le faaaogāina o le suafa i suli moni o le suafa Puepuemai.

E lua itupaepae o si o matou aiga i totonu o le afioaga o Vaiofoga o loo faatautaia e le fetalaiga ia Faanoituloa ma lalo i le maota i Vailoa o loo faatautaia nei e le fetalaiga a Alaifaiva.

Na ona fia faailo le iuofe a le tautai auā le silafia o le mamalu o le atunuu aemaise i le aufaitau.

O le atalii o Tuiosamoa i Falealili o Tuiatua Polailevao na usu ia Moemoefuifatu le alo o Pa’u i Fusi Safotulafai, faaee ai le gafa o Tuiatua Fotuitaamai. O ia lea na usu atu ia Tetetamaitai le alo o Leifiletaua i Vailoa Aleipata ona faaee ai lea o le gafa o Puepuemai ma lona tuafafine o Aliitasi.

O le uluai usuga lava na maua ai tama e toatolu o Saulia o Polamalu ma Togafau. Ma o i latou lava nei na faia ai tofiga e lē gata i totonu o lo matou afioaga ae faapena foi i le itumalo o Aleipata.

O Polamalu suafa ia Fagasoaia e suea le siapo auā Fuataga ma Tafua ae o Saulia e suli mai ai le suafa Puepuemai. O Togafau o loo iai nei le afio o le Sa’ofetalai le afioga ia Saumalu ma le Falelima. Auā o Leifiletaua le tamā o Lolo na usu i le taupou a Siumu le teine o Salulaufala na faaee ai le gafa o Leifitautoloitua ma lona tuafafine o Tetetamaitai le tina moni o Puepuemai.

I le soloaiga ma le nofoia ai o le nofoa i le suafa seia paia le nofoaiga taulata mai…na usu ai Puepuemai Saua ia Merita le alo o Amituanai i Lalomanu faaee ai le gafa o Puepuemai Uaine ma lona tuafafine o Tui. O Uaine na pa (tulou) e leai sona suli peitai na usu mai Fagasoaia Filipo ia Tui faaee ai le gafa o Asafo ma lona tuafafine o Va. Sa iai ma so la tausoga o le tama o Tavita sa faasuafaina ia Polamalu sa soifua pei o se uso ma se tuagane ia laua ma o latou nei sa nonofo loa ma tausi le aiga i Vailoa.

Ina ua tuua le malo e Puepuemai Uaine na tasi ai le moe i le aiga i Vailoa o le a faaee mamalu ia Asafo le ulumatua a Tui. O le usuga muamua a Puepuemai Asafo ia Faapopole i Lotofaga e iai nisi matutua peitai o le pine faamau o Alaifaiva Saolotoga o loo faatautaia le sa o le matou aiga i le taimi nei i Vailoa e lagolagusua i le fetalaiga a Faanoituloa Malama o le isi itupaepae.

Na toe usu Puepuemai Asafo ia Atata le alo o Tago mai Samusu faaee ai le gafa o Puepuemai Faapusa ma lona uso o Alafaapae Uaine ma ni tuafafine. Sa nonofo lua mai ma Puepuemai Sitivi i le isi itupaepae. Usu Puepuemai Faapusa ia Levei le alo o Sagatu faaee le gafa o le tamaitai o Emi.

I le tausaga 2009 sa tuua ai le malo e Puepuemai Faapusa ona avanoa ai lea o le nofoa. I le 2015 sa faaeeina ai loa le suafa ma faasafua i nisi o suli o le aiga peitai na oo atu le mataupu i Mulinuu ma faatonuina ai loa e soloia uma nofo sa faatinoina. O le iuga o le faamasinoga ina ia auai uma suli ma ia faamalumalu lava suli o Polamalu ma Togafau iai i le filifiliga o le suafa.

O le tausaga na se’i mavae atu sa faate’ia ai ina ua faia se nofo a Papalii Iosefa o le alo o Puepuemai Sitivi i Vaiofoga, talu ai e lei logoina foi le aiga o lea sa faia lava tiute o le faamasinoga ina ia ave le mataupu i tua ma faia se faatofāla’iga ma soalaupule i suli uma o le suafa Puepuemai auā o suli uma o Saulia e au uma i le suafa.

I le aso 21 o Iulai 2018 na faia ai le feiloaiga a suli uma i le maota i Vailoa ma soalaupule ai mataupu uma ma tasi ai le faautautaga i le aiga mo se lelei ma le agai i luma ina ia faia se faaleleiga o suli uma aemaise i itu paepae e lua e pei ona ou ta’ua. O le ala foi lea o lo’u malaga soo o le taumafaiga lava ina ia maua se toafilemu o tamā ma tina ma suli uma o le aiga auā o lea e tutupu ane alo ma fanau ma vaai iai.

Sa fai ai loa se sainiina uma o aao o i latou sa auai o suli moni o le suafa ina ua tasi o le a toe feiloai ia Setema i le aso 29 mo le filiga o se tasi poo nisi o le a seei mai i le suafa.

Na feiloai loa lea i le aso 29 ma faamanino ai e suli o Polamalu ma Togafau ina ia faamalilie uma fua’ifale o iai nei ia i latou ua ta’ua ua suli o Saulia. Sa tuuina atu loa lea sainigalima e tali atu ai le manaoga o le faamasinoga ina ia faia se fefaatofala’iga a lo matou aiga.

I le aso 8 o Tesema sa toe feiloai ai ma faamautuina ai le omai o itupaepae ma a latou nofo o le a faataunuuina i le aso 29 o Ianuari e pei ona atofaina.

Peitai ua lē ogatasi foi le futia ma le umele ina ua saunoa manino le fetalaiga a Faanoituloa Malama ua leai se tasi o le latou itu ona e lei iai a se tasi ua mautu iai le filifiliga aemaise lava i suli o Puepuemai Sitivi. O lea sa faataunuuina ai loa nofo i lo matou pito i lalo i le maota i Vailoa.

O lea la ua pale mai ai i latou nei e toatolu:

• O Puepuemai Asolelei Alafaapae Uaine (suli o Puepuemai Asafo) ma o le faafesagaiga foi lea ma le afioga i le Sa’ofetalai (Saumalu) i totonu o lo matou afioaga.

• O Puepuemai Tolufale Alaifaiva Tema (suli o Polamalu Tavita)

• Susuga ia Tooa afioga Puepuemai Salometaioaanamatuamasaga Peteli (suli o Va).

Lagona ai lava le faamaulalo pea o le loto ma faafetaia le alofa ma le agalelei o le Atua ina ua Ulimasao lenei faamoemoe sa tulivae ai pea i lona filemu ia o matou faia ma faataunuu i ala e finagalo ai.

Sa matuā faafetai si o matou tamā ua avea ma faatamā i si o matou afioaga afioga i le Sa’ofetalai Saumalu ia Puepuemai ma lo matou aiga i le tofa ua a’e ina ia pale mai auā o le fefaasaga’iga i totonu o le matou Afioga Puepuemai ma Saumalu. Na saunoa ua ia lagona lona fiafia ua leva na vaoa ma lē nofoia le nofoa o le aiga ae ave a le mua ma le faafetai i le Atua ua tau lau o le faamoeme ma ia tautuana alolofa i le nuu.

Sa iai le faamoemoe e faaeeina ai le Tuiga o le afioga a Aliitasi peitai ua lē faataunuuina ae atonu e iai se taimi lata mai o le a faataunuuina ai lea faamoemoe auā foi le fefaasaga’iga ma le afioga ia Suluifaleese i totonu lava o le matou Afioaga.

Faamatalaga na tuuina mai