O le afiafipo o le Aso Faraile, 24 Ianuari 2014, na potopoto ai i le maota i Logomasa suli ma feoi o Lemalufaito‘aga i le itupaepae o Pio i Nofoalii e momoli i luma o le Atua le Faafotutupu i le Suafa Lemalufaito‘aga faapea le Faafotuovaaulu i le suafa Tanuposemanaia ma le suafa Tolumafaga.
Na auai faatasi i lea afiafi le Aufaigaluega paia a le Atua mai fata faitauaga eseese o loo nopiai i totonu o le afioaga, aemaise le tapuaiga i le nofoituaiga i le Faleaana.
O le susuga i le Fesoasoani Katoliko le susuga ia Selulo sa taitaia le sauniga e faapaia ai le Faafotutupu a o lumanai le taeao sesegi o le Aso Toonai 25 o Ianuari 2014, sa faataunuuina ai le faamoemoe, ina ua Aliitaeao Tanuvasa ma Satuala aemaise le usu faaaloalo i le Faleaana. Na faatumulia ai le maota i Logomasa i le Aliitaeao faapea le usualele i le matua ia Leulumoega ma Aana Sa na Eseese faapea Tumua ma Pule.
O lenei faamoemoe sa fau ao fau po, na afua mai le tapenaga i le faatasiga (reunion) a le Aiga Sa Lemalufaito‘aga sa faia i Ueligitone i le masina o Ianuari 2012, na tasi ai le aiga potopoto i suli ma feoi o Pio, o le tofa ia Tanupo Fiu Fogalevai Ameto Aukuso, ma le tofa ia Tanupo Mikaele Malaga, o le a faafotutupu i le suafa Lemalufaito‘aga e faasa‘osa‘o i le Aiga.
O le faatofala‘iga lea na afua ai le faamoemoe e pei ona faataunuuina nei. Sa faamalumalu i le faamoemoe le afioga ia Lemalufaito‘aga Felise o loo faasa‘osa‘o i le aiga aemaise le Itupaepae o Felise, peitai, sa auai e faamalumalu ma o ia foi na momolia le Faafotutupu i luma o le nuu.
O le tofa ia Ita Otemai Liu na tasi i ai le faatau a le Nofoituaiga i le Faleaana na te faapaiaina le Faafotutupu. O le lauga na logo faatutuila ai tulimanu e fia o le maota i Logomasa i le vagaga faaalualu na timai ai Lemalufaito‘aga ma Lemalufaito‘aga i le tāua o le valaauina o laua e tausia le aiga.
O le susuga ia Tanuvasa Moleka na saunoa e fai ma sui o le Aiga Sa Tanuvasa, ae o le afioga ia Taimalie Oilau na saunoa e fai ma sui o le Aiga Satuala, auā lava faamanuiaga mo le Faafotutupu. O le agaifanua a le Faleaana, e lē nini faatasia le Faafotutupu ma le Faafotuovaa‘ulu, ina ua mae‘a ona taute ‘ava o le ipu ia Lemalu ma Lemalu faapea Tanuvasa ma Satuala a o o se ‘ava taumafa i le Faleaana, ona alo ane lea o le Faleaana e faapaia le faafotuovaa‘ulu i le suafa Tanuposemanaia ma le Tolumafaga. E toafā i latou na faasuafaina i le Tolumafaga ae toalima sa faasuafaina i le Tanuposemanaia o pitovao ia o le Lemalufaito‘aga.
O le tofa ia Gaseata Koloseta na fetalai e faapaia le faafotuovaa‘ulu i le Tanupo ma le Tolumafaga. O le afioga ia Lemalu Felise na saunoa, e fai ma sui o Lemalufaito‘aga ma Lemalufaito‘aga e faafetaia le galuega fai a le Faleaana, aemaise Tanuvasa ma Satuala, ma molimoli faigameaalofa ma faaaloaloga e pei ona masani ai tulaga mamalu o aso faapenei.
Na ta‘ape ma le fiafia le afioaga aemaise malo usu, ona ua faamalieina i faaaloaloga a Lemalufaito‘aga ma Lemalufaito‘aga faapea o la pitovao e pei ona molimoli atu e le afioga ia Lemalufaito‘aga Felise.
Na faaalia le agaga fiafia o le aiga potopoto aemaise le afioga ia Lemalu Felise ina ua mae‘a lenei faamoemoe ua leva ona fauao ma faupo.
Ua lagona foi e itutino uma o le aiga ua atoa tino o Vaatausili, auā ua nofoia le tala o Lemalufaito‘aga, ae ua faapea foi le pou fetalai o Tolumafaga ma Tanupo pe a fonoa Faleafega ma Logomasa o maota e faasino ia Lemalufaito‘aga i Nofoalii.