Faafotu-Tupu o le suafa LAVEA ma PESETA-Tamalelagi i Safotu

O le faaiuga o le vaiaso na se‘i mavae atu nei, na matuai faatumulia ma lē ofi ai maota ma laoa tapuai o le Afioaga o Safotu i le Itumalo o Gagaifomauga i le Motutele i Salafai, ina ua faatino le faafotutupu i le suafa LAVEA o le Afioga ia Tagaloamatua Mulitalo Paleaaesina Laveanafiloitumua Laulu Tumanuvao Lisona.
E lē gata ina usu faaaloalo le Afioaga i le faafotualii i le Afioga i le Tupu ma le Alii o le itu, ae sa faapea foi le itumalo atoa ma malousu mai vaega eseese ia Tumua ma Pule.
O le Maota lava o Sulamai i le Falepoufa i Finao na faatino ai le faapaiaina o le nofo. O Pa‘ia faasino i le afio i Sa‘o e fā, susū le aiga Sa-Umalau, alalatai le Pouniu ma le Faasau, alalatai lau tofa i le Tulafale, lau Tofa Lavea o le alii o le itu, na e mua i malae.
O le Tofa Lavea Tagaloamatua Mulitalo Paleaaesina Laulu Tumanuvao Lisona ua leva tausaga o tautua i le ofisa o le Esetete Tausi a Samoa le WESTEC, faapea le kamupani o le 3L Civil Eng. Construction Ltd.
Sa tele lona sao i le ofisa o Taaloga ma Aganuu i le atinae o le taaloga o le fusu, softball, volleyball ma le basketball. O se tamalii iloga lona tomai i le tautuaupu i tu ma aganuu fesootai a Samoa.
Sa faauuina mai le Iunivesite Aoao a Samoa ma o loo umia se faailoga taualoa i le mataupu o le talafasolopito o Samoa ma talafaasolopito o le lalolagi. O se tamalii limaola e ala i ana faatoaga tetele.
Na mae‘a le faapaiaina o le faafotutupu a le Tofa i le Alii o le Itu ia Lavea, ona liliu ane lea o le aiga Sa Lavea ma le afioga i le Sa‘o ia Lavea Tovio Leitupo ma faaee le suafa Peseta-Tamalelagi i le alo ulumatua a le Tofa ia Lavea Tagaloamatua Mulitalo Tumanuvao Lisona, le afioga ia Savea Leulua‘iali‘i Al Harrington Lavea.
O Savea Leulua‘iali‘i Al Harrington na malaga atu i Niu Sila, ma ua faamanuiaina ma amanaia e lona aiga potopoto ina ia pale i le suafa Peseta-Tamalelagi e ala i lana tautua ‘aitaumalele e lē gata i lona aiga i Samoa ma Niu Sila, ae faapea foi lana tautua ia Samoa i le tele o tausaga i le galuega faasalalau i leitio ma televise faapea le tusitala mo nusipepa.
O le Afioga Peseta-Tamalelagi Savea Leulua‘iali‘i Al Harrington Lavea, o loo galue pea mo le Radio Ramoa 1593am i Aukilani i le polokalame o “Tui ma Savea ma le la tanoaava” i Aso Toonai, a o faaauau pea lana aoga i le Iunivesite o Aukilani mo le faailoga i Upufai o Malo ma le tulafono (Politics/Law).
O se tamalii ua lauiloa ia Samoa i ana taleni faafiafia e ala i musika faapea le tautuaupu i sailiga seleni a le atunuu aemaise o nuu ma afioaga e malaga mai Samoa.

Afioga Peseta-Tamalelagi Savea Leulua‘iali‘i Al Harrington Lavea Tofa Lavea Tagaloamatua Mulitalo Paleaaesina Laulu Tumanuvao Lisona