O le tofa mamao i le afioga i le Sa‘o le afioga ia Faumuina Maika II, faapea le afioga ia Faumuina Ioane, ua tatau ona sailia nisi nofo e fesoasoani i le tausiga o le Aiga ua tupu ma ola.
Ua loa tausaga e lei toe faia se nofo i le suafa Faumuina i le afioaga o Papa, ua faasolo foi ina pulapula lagoto le soifua o tamā o loo tausia nei le aiga ma ua alaga tatau ai lava ona sailia nisi e tausia le aiga.
O le amataga o le tausaga 2012 na feiloai ai le aiga i le maota i Falefeausiga ma tatala ai le avanoa i fuaifale taitasi e filifili mai ai nisi e talitonu ua agavaa e faaee i ai le Suafa Faumuina.
O le Aso Lulu 23 o Ianuari na toe potopoto ai le Aiga i le maota i Falefeausiga ma faapea ai ona auiliili i latou ua faatutū atu i Fuaifale taitasi mo le suafa Faumuina, ina ia mautinoa o nei tagata uma o suli moni o le suafa Faumuina le Tupufia.
E lei faatumutumulima le suesuega ma le filifiliga, sa sailiili toto‘a ina ia mautinoa, ua na o i latou lava o suli moni e faaee i ai le suafa.
Auā o nei aso ua tele ina valetuulima measina a mea nei o Aiga ina ua filifilia tagata ese e ta‘ita‘ia Aiga.
Na mae‘a le filifiliga ma faamaonia ai e le aiga potopoto e 14 nofo mai fuaifale taitasi ua faamaonia ua agavaa ma tatau ona faaee i ai le suafa Faumuina.
E le gata i lea sa faapea foi ona filifilia nisi e faaee i ai suafa tulafale o le Asomualemalama, Tauatamaniuliita, Matagitau ma le Ava, auā upufai o nofo o le a tulai mai.
O le taeao manino o le Aso Faraile, 25 o Ianuari na potopoto ai i le maota i Falefeausiga suli ma feoi o le suafa Faumuina le Tupufia, mo le faataunuuina o le faamoemoe.
Sa faapea foi ona faataalolo mai le paia o le afioaga auā le afio o le afioga i le Nofoa-ao faapea le Tamaitai, afio mai Faumuina ma Silafau ma lau fetalaiga Maui Siisii ma le mamalu ia te oe Saluitoga, aemaise le mamalu i le itumalo ma le atunuu e molimauina le faamoemoe.
O le sauniga mamalu i le faapa’iaina o nofo sa ta‘ita‘ia lea e le susuga i le Faafeagaiga ia Faamanuia Faaaliga, ae lagolagosua i ai le Susuga i le Faafeagaiga ia Vaoiva o le ekalesia Nasareta.
Na mae‘a le faapaiaina o nofo, ona tuumuli lea o le Aufaigaluega a le Atua ae alo ane le usu faaaloalo a le afioaga lea na fetalai ai le tofa ia Maui Siisii Tuna e momoli le faamanuiaga a le Nofoa-ao ma Silafau faapea le faafaleupoluga ia Saluitoga auā nofo fou, na ia fetalai ai o le gafa e lē toe taufaailoaina le gafa o le Faumuina le Tupufia ua lauvivilu i ai Samoa, auā o le gafa e tau i le niutea.
O se faamoemoe sa malu ona itu uma, e pei ona molimauina i lea taeao ma o se fiafiaga foi i le Alii Matua le afioga ia Faumuina Maika II, ua faaopoopo le soafaiga e feagai ma le tausiga o le aiga.
I le fuifale o Faavale Faatafa na filifilia ai le afioga ia Faumuina Valoaga Faatafa, o le afioga ia Faumuina Mika Vaega Faatafa, ma le afioga ia Faumuina Taufau Gardenia Aukuso.


