Faafoi le 737-800 ae aumai le 737 Max 9

O le sainiga o le MOU poo le Memorandum of Understanding ua lisi mai ai e le Lease on Air se vaalele sili ona lapoa e toatele le pasese ma tele le avanoa mo malaga a le Samoa Airways
O le sainiga o le MOU poo le Memorandum of Understanding ua lisi mai ai e le Lease on Air se vaalele sili ona lapoa e toatele le pasese ma tele le avanoa mo malaga a le Samoa Airways

Na atoa i a Novema o le tausaga ua mavae le tausaga talu ona toe faagaioia le kamupani vaalele a Samoa mo malaga i Niu Sila ma Ausetalia, a’o lea ua faamautu le fuafuaga mo se isi vaalele sili ona toatele le pasese e malaga ai ma le avanoa mo uta e tautua ai malaga a le Samoa Airways.

O le vaalele 737 Max 9 fai mai le taitaifono o le Air Lease Corporation o Steven Hazy e toetoe lava tutusa lona lapoa ma le vaalele o le 767-200. O le taitaifono lea o le kamupani o le a lisi mai ai le vaalele fou e taunuu i se taimi o le masina o Mati o le tausaga nei. E taunuu loa le vaa lea toe faafoi le vaalele 737-800 o loo faaaogā nei ae e oo atu i le masina o Iuni e pei ona faailoa e le Palemia, Susuga Tuilaepa L Sailele Malielegaoi ua aumai le isi vaalele e lua ai vaa o le Samoa Airways mo ana malaga lava i atunuu e mamao e ese mai ai ona vaa laiti o loo faia malaga i le va o Apia ma Pagopago.

Na saunoa le taitaifono o le Komiti Faafoe o le Samoa Airways le afioga Feesago George Fepuleai ma ia faafetaia le Malo i tuu atu o le lagolago i fuafuaga a le kamupani vaalele mo le lelei o lana tautua. Na aumai ai foi se faafetai a le taitaifono i le lagolago malosi a le atunuu aemaise o lona naunautaiga ia avatu ma le lagolago a le media poo le aufaasalalau.

Na faailoa e le Palemia i le sainiga o le maliega ma le kamupani o le Air Lease Corporation o le kamupani foi lea na lisi mai ai se tasi o vaalele 737 sa faaaogā i le taimi o le kamupani vaalele o le Polenisia. E lē o faigofie le galuega o loo feagai nei ma le pulega o le Samoa Airways ona o loo iai pea tulaga vae o le Polenisia sa feagai ma faafitauli tautupe, O le tatalo lea a le toatele ia aua ne’i toe aafia ai le kamupani vaalele a le atunuu.

Ua faamauina o le Samoa Airways ua pito toatele pasese na ia aumai i Samoa e fua i le tausagae tasi ua atoa o lana tautua, o se eseesega lea ma pasese na aumai i Samoa e isi kamupani vaalele e pei o le Air New Zealand ma le Fiji Airways.

O le vaalele o le a aumai i a Mati o le ituaiga fou o fausaga o vaa o le kamupani o le Boeing ma o le Samoa Airways le kamupani vaalele muamua i le Pasefika ua ia faaaogāina. Ua fuafua e 16 nofoa mo pasese i le vaega o pisinisi ae 173 nofoa mo pasese i le vaega o le economy.