Ua faafetai ua faamanu, ua tali mai le Tama o i le lagi!
Ua o ni ufi e tutupu i tino matagi lelei ina ua aumai faaaliali le tali a le Atua e ala i le taumafaiga sa tuuina atu i nai tausaga ua mavae ma salalau ai le tala i luga o leitio ma nusipepa aemaise o vaega uma o ta‘ape ai Samoa.
E lē o toe po se lilo e tusa ai ma le auai mai o le tamaitai loia le afioga ia Leulua‘ialii Olina Woodroffe e fesoasoani i lea foi mataupu. Sa a‘e mauga, ifo vanu, sa lei manumanu foi i ni tupe faaalu ona o le finau lava ia a‘e manuia, lea na tuuina mai ai loa le faatonuga mai le au Peresetene sili aoao a le ekalesia i le Mauga o Siona mo le toe faafoiina mai lea o Iunite Samoa i Stakes taitasi i Kuiniselani. Viia le Atua!
E talitonu le loto e lē faia mo se toatasi ae ona o le vaai alofa i nai mātua matutua, o alo foi ma fanau lalovaoa ae faasilisili ai le toe faafoi mai o le gagana Samoa o measina e faamemelo i ai Samoa.
Sa outou fagogota i le sao na faiva i liuloa a o lenei ua tinio le uto e pei o le faiva o tapalega auā o lele ua ataata o Ta‘uleleia ma vavala mai le manuia sa lilo. O lea ua tatala puna vai ola e ala i Paranesi ae o se aso ma se taimi o i luma ona tatala lea o Uarota i le tele o Stakes.
O le masina o Setema i le tausaga ua mavae na tatalaina ai Paranesi i le pitonuu o Ipswich ae o lea ua tatala i le masina o Fepuari Paranesi i Logan City.
O le susuga ia Porotesano Uta‘i ua avea ma peresetene o le Paranesi a Logan ae o le susuga ia Ekeroma Fiso o le Fesoasoani muamua, Fesoasoani lua o Alema Masame.
O le fono mulimuli i le aso 1 o Fepuari na tapunia ai loa le Aiga Samoa ma o le faamoemoe ma le auga o le alagaina o le viiga o le Atua o le a faaaogā pesega ma lauga faa-Samoa i totonu o sauniga. Se mea lava ina a matagofie o uso ae mafuta ma faifai mea faatasi lea ua tuufaatasia nei le tele o Samoa uma i lea pitonuu. E toatele tagata Samoa o loo tapuai i le ekalesia a Iesu Keriso o le Au Paia o Aso e Gata Ai ma o se ekalesia e vaaia foi le tupu ma ola i totonu o Kuiniselani.
E momoli le agaga faafetai i le Aiga Samoa ma nisi foi o tupu ma ee, aemaise nai toe ulutaia o le atunuu sa nofo tatalo pea ma finauina lenei mataupu ina ia toe faafoi mai le gagana Samoa aemaise Samoa uma lava o loo i le Ekalesia. Ia sagai ane loa ‘ai o le tai ia manuia le nofoatoo i le Peresetene ma ona Fesoasoani ua tulai mai i matagi‘olo e faatautaia le galuega a le Atua ma ia manuia le ekalesia atoa. Ia tumau pea le felagolagomai, fealofani ma le galulue faatasi ae maualuga ai pea le viiga o le Tama o i le lagi.
