Faafiafia le faaili a le “Young Ulalei” i Brisbane

Ua loa tausaga o aave mai tala o lo logomālie o le faaili a le Young Ulalei i Melepone, ma ua loa foi ona tatali e le aueva i le musika le taunuu mai o lenei faaili se‘i faafiafia i malae o faafiafiaga o Brisbane. Na taitai mai e le susuga i le taitai faaili ia Taupau Salafa Opapo, faapea le faletua, le aufaili ma le aumalaga.
O nisi o loo auai i le faaili e aofia ai Ufiufi Finau, Lokeni Evile, Suelaki Sapolu, Lossie Pepe, Letele, Jacinta Ekeroma, Christian Ulalei Opapo. E toatele le aufaaili na malaga mai ma na matuā faafiafiaina le auevaeva ona o le logomālie o le faaili aemaise siufofoga mālū o tamaiti mai le aai o Vitoria. O le susuga ia Taupau Ulalei Opapo sa fai ma Fofoga o le po.
Na lagolagoina foi e le vaega a le JD Financials, faapea nisi o tupu ma tamalii sa faatasi atu aemaise tauaiga, uo ma ē masani.
Na faaiuina le po fiafia e aunoa ma se vevesi auā na malupuipuia le leoleoga a sikulaki o le po.