Faafiafia le alii pese, Richard Parker i le laumua

O se po matagofie felanulanuai i faafiafiaga eseese sa faaalia i le po o le Aso Faraile 14 o Iuni i le maota o Te Akapuanga i Porirua. Na faatumulia le maota i le mamalu o le aumaimoa o le atunuu mai soo se pitonuu o le laumua e oo lava i Levin ma Palmerston North na malaga mai lava e maimoa i le alo talenia o le atunuu i le pese.
O ni isi o aiga ma uo a le tamapese le Afioga ia Le‘autuli‘ilagi Richard Billy Parker na malaga mai lava i Samoa ma Ausetalia e lagolago aemaise le maimoaina o le aufaafiafia mālie na latou fesoasoani i le faafiafiaina o le aumaimoa.
O le tuaa o Le‘autuli‘ilagi R. Parker o Maupenei Parker na malaga mai Melepone Ausetalia ma le faletua o le alii pese o Tina Parker, faapea le nofoaalo faatasi ma lona tuafafine matua o Mona Parker mo lenei faamoemoe.
E matagofie foi le faafiafiaga tau siva na feagai ma le vaega tamaitai laiti o tausoga lava o le tamapese faapea foi le faa‘ili mālie a le alii o Henry Samia ma lana vaega sa fesoasoani malosi i pesega mālie o le po.
Sa faapea foi ona faafiafia ai i ni pese le alii o Victor Parker le isi foi tausoga o le alii pese. O le alii pese o le alo o Sauoaiga Valentine Parker ma Maupenei Parker o Fugalei, Salelologa, Tapatapao ma Saleilua Falealili.
E tele ni valaaulia o le alii pese i totonu o Ausetalia. Na faapea ona valaaulia faalua mai Samoa ma le Teritory o Amerika Samoa i taimi o le faamanatuina o le sisigafu‘a a malo e lua. O le tasi ana koneseti na faaalia lea i le Maota o le Malaeola i Aukilani ma o le taimi muamua lenei ua oo mai ai i le laumua o Ueligitone e faatino ai lana koneseti pese ma faafiafiaga eseese.
O lenei lava aiga o se aiga talenia i faafiafiaga tau pese, musika ma siva, ma o le tupulaga laiti foi o le aiga o loo ua amata ona vaaia ma faalogoina le tomai i le musika. Ua iai le faamoemoe e toe taliu le susuga i le alii pese ma lona aiga i Ausetalia i le Aso Gafua 17 o Iuni ma e talosia foi ia toe maua se isi avanoa e toe feiloai ma faafofoga ai le mamalu o le atunuu i se isi koneseti malie a lea alo o Samoa.
E faamanuia atu i le galuega ma le taleni ua foai atu i le alo o le atunuu ma ia taunuu lelei fuafuaga uma o loo faamoemoeina mo le tautuaina o o tatou tagata.