O le agaga lotonuu Samoa ma le fia tuufaatasia o agaga i le faamanatuina o le aso tāua o le atunuu pele, na lē manofonofo ai le autalavou a le Ekalesia EFKS Pine Rivers i Kuiniselani Ausetalia, i le fia faatino o so latou sao i le aso na faamanatu ai i lea Setete o Ausetalia, le 50 Tausaga o le Iupeli Auro o Samoa.
E to‘a 25 le ausiva a le Ekalesia sa faafiafia i lea aso faamanatu o le Fu‘a a Samoa i Perisipeni. O le ausiva e fefiloi uma ai lava, amata mai i fanau talavou o loo aooga, e oo atu i le vaega ua faiaiga (young parents) ae o loo talavou pea le soifua. O le faagaeetia o nei tamafanau a le atunuu, ona o le tausaga muamua lenei ua latou faatino ai se sao i le faamanatuina o le Tutoatasi o Samoa, e ui na faatino atu lava i Ausetalia, le atunuu ua alala ma papaaao ai. O loo mafai foi ona maimoaina le video o faafiafiaga a lenei ausiva i luga o le YouTube.
