Faafetaia le agalelei, Toomaga o Tagata Puapuagatia

Ua tolu nei tausaga talu ona aafia le tamā o Fausia Tolovae Emau i gasegase o le tino ma aafia ai i le stroke, ae ui ina manuia ma toe sologa lelei lona soifua ae ua faigata ai lava ona toe maua lona malosi sa iai.
O le molimau a si ona toalua, le tina o Faaeseina sa mafai lava ona fealuai solo le tama o le aiga, ae peitai sa iai se taimi na pa‘u ai ma le mafai ai loa ona toe maua le tulaga sa iai, o le savali lava o ia i mea e fia agai i ai.
Sa fia maua se fesoasoani mai le Matagaluega o le Soifua Maloloina mo se nofoa faataavalevale poo le wheelchair ona ua faigata le agai i le fale taele.
Peitai o le tala a le matagaluega e manaomia se tusi talosaga e ave i le faauluuluga o le vaega o togafitiga, e maua ai le tali pe talia le talosaga mo se nofoa pe leai.
Sa avea lea aiaiga ma mafuaaga o le maua o le lagona musua, ona sa faapea e faigofie se talosaga e vave maua ai se fesoasoani. Sa saili atu foi i isi faalapotopotoga e pei o le Koluse Mumu ae o le tala ane e tuu atu pea le suafa a oo loa ina maua se nofoa ona logo ane lea, peitai ua tuai ae fia maua vave se nofoa.
O le talosaga na tuuina atu i le Faalapotopotoga o le Toomaga o Tagata Puapuagatia na logoina ai loa e faatali mo se masina, ma e lei pine le tali atu a le faalapotopotoga ma maua ai loa le fesoasoani mo le tama e pei ona ia faaaogaina ai nei se wheelchair ua foai e le faalapotopotoga faatasi ai ma le fesoasoani a le tamaitai Sa pule o le nofoaga o tagata matutua i Mapuifagalele.
O le aso Toonai 3 o Oketopa 2009 na tauaao atu ai loa le nofoa faatavalevale.
O le taimi nei ua matua lagona e le tama lona fiafia ua faigofie lona fealuai aemaise lava i le agai i le fale taele.
O le Aso Sa foi na sosoo ma le Aso Toonai na ia maua ai lea fesoasoani na oo ai i le falesa ma auai i le sauniga lotu masani a lana ekalesia.
O le faatoa toe ulufale lea o le tamā i se sauniga talu ona aafia le tino i mai. O le agaga fiafia foi lea o le tina o le aiga ma lana fanau ona ua le gata ina mafai ona agai le tama o le aiga i le lotu, ae ua mafai ona fetosoai solo ai e lana fanau e faatafao i fafo ma maua ai se isi vaaiga fou, nai lo le tulaga sa iai sa na o le taoto ma moe ma seesee solo i le fale.
O le tama o Fausia ua 73 tausaga o lona soifua ma o gasegase o le tino ua vave ona nofo fale ai, ae o se tama e molimauina e lona aiga ma ana uo, e le fia malolo ise taimi o le aso i ana galuega faatagata tausi aiga.