Faafetaia e turisi le alolofa o tagata Samoa a o feagai ma puapuaga

O Axel Hledzik 63, (e faaleo – Ludzig) ma lona toalua o Karin e 61 tausaga le matua ua sauni nei e toe foi i Siamani i le mae’a ai o se tafaoga o le a manatua pea i aso o totoe o lo la soifua.
O le aso 16 o Setema na taunuu mai ai i Samoa. O se ulugalii ua tele atunuu o le lalolagi aemaise le Pasefika ua asiasi i ai i tausaga ua mavae ae o le la filifilia o Samoa mo tafaoga i lenei tausaga, ona na taua e le tama ia Axel ona ua tele atunuu la te asia, ua tele ai suiga faaonapo nei.
“O le mafuaaga lea na ma manatu ai e asiasi mai i Samoa aua ua o ma maua ripoti o se atunuu e malosi ana tu ma aganuu ma na ma mananao e molimauina lea tulaga i le soifua o tagata Samoa i aso uma aemaise o le tulaga lea e ui ua iai suiga, e tele lava ina faamalosia ana tu ma ana aga,” o se faaaliga lea a lea tama ua faaliliuina.
O le afioaga o Maninoa i Siumu i le Faletalimalo o le Coconuts Beach Resort lea sa mulimuli i ai le asiasiga i le maea ai ona taamilo i Savaii ma vaega e tele o le motu o Upolu.
O le taeao o le aso 29 o Setema lea na lulu ai le mafuie na tamomoe mai ai i le fafo o le la potu sa i le fogafale lua o lea faletalimalo ona na taua e Axel na matamata i le tsunami lea na aafia ai Thailand ma le tele o lea itu o Saute i Sasae o Asia na matua le aoga uma fale e oo i fale fogafale lua.
O le o mai o lea ulugalii i fafo ae fetaui ma le ta e le uluai galu na aafia ai Samoa, o le galu muamua lava lea na taua e lea tama na lavevea ai ma lona toalua ae ona pau lana faatonuga i lona toalua e fafa atu i lona tua ae mau loa le toeaina i le niu sa i luma lava o le faletalimalo.
E oo mai le galu lona lua ua ia le toe lagona lona toalua sa fafa i lona tua. Faaalia e Axel ona pau lava lona iloa o loo i lalo o le sami, palapala e tumu i oneone, fasi tioata, o otaota ma ogalaau ae toso atu loa ia i luga e ni tagata Ausetalia sa o latou nonofo faatasi i lea nofoaga.
Faaalia e lenei tama na matua tau le mafai ona manava ae na toso atu ia i luga ma taumafai loa e tamomoe agai i le fogafalelua e lei lavea.
O lona toalua na toso ane e nisi o tagata faigaluega Samoa o le faletalimalo a o mau ai i se isi foi niu i luma atu ae ua ia leiloa atu lona toalua.
Taua e lenei tama na vave ona toe tamomoe ese ma le faletalimalo aua ua vaaia le isi galu ua sau e ui ina laititi atu i lo galu na uluai taia le faletalimalo.
Na ia taua le le mautonu i le laititi tele o lenei taimi na vaaia ai le galu ae o le saosaoa tele lea na mafua ai ona fenumiai le mafaufau ona ua vave osofai i latou.
E lei leva ae taunuu atu loa Dr Emosi Puni, Dr John Adams ma le aufaigaluega a le Falemai Tumaoti o le MEDCEN ma o i latou ia na taua e lenei tama, e lei toe faatali ae ao uma i latou nei na i le faletalimalo ma o faguvai na o latou o atu ma i latou ae le gata i lea o vai na la’u atu e sui o le afioaga o Maninoa na vave ai ona aveese le oneone ua maua i taliga, o isu o totonu o mata ma vaega uma o fofoga.
Faaalia e lenei alii le agaga faafetai, i nei Samaria agalelei i lo latou alolofa atu ia i latou ma o le tamai taimi lenei na tulai mai ai lea faalavelave, o le fesootaiga e pei o se aiga lea na vaaia i le va o tagata asiasi mai aemaise o tagata Samoa e ala i sui o le nuu o Maninoa, o se tulaga lea o le a le mafai ona galo ia i laua.
Faaalia e Axel e fai o le la’u atu o le vai, o le la’u atu o lavalava o le falemai lenei mo le ufiufi ai o tino ua matua le lavalava. Taua foi e lenei alii o le va lava ia o tagata tafafao mai, ua alu le vaiaso e alu lava le aiga ia aua e faigata fesootaiga ona o i laua e le lelei le fesootai i le gagana Peretania, ae o le taimi na tulai mai ai lenei faalavelave ua tei lava ua potopoto uma tagata sa i lea nofoaga ma ua le faailoga lava se gagana e talanoa ai ona o le taumafai e fesootai ma fesoasoani le tasi i le isi.
O tagata Ausetalia ia na fesoasoani i lenei ulugalii ina ua iloa ua tafefea uma ato lavalava atoa ai ato tupe na vave lava ona o ese ae foi atu ma lavalava mo le ulugalii lenei na matua aafia. E le gata i lea na tuu atu tupe ae o tagata Samoa o taumafa ma le suavai e lei malolo aemaise o le vaega o le falemai o le Medcen na vave togafitia i laua.
O le tama na aafia lona ao ma na fai ai lava i le faletalimalo fusiga ma togafitia ai manua o lavea o ia ma lona toalua mai i le mau otaota na sau le galulolo ma aumai i le paumatu.
I sana saunoaga na ia faaalia ai le manaoga e momoli le faafetai i tagata uma o Maninoa i le le manatu i o latou puapuaga ae ua vave ona oo atu i le nofoaga na iai tagata mai fafo aua le fesoasoani atu ia i latou.
E le gata i lea o le falemai ona o le leai o se vaai i se tupe e tau totogi ae ua fai lava togafitiga i le taimi vave na moomia ai. Na manino le ootia o lenei tama a o faamatala le agaga alofa o nei tagata aemaise foi o tagata Ausetalia na aveesea o ia a o lona manatu o ia lava ua malemo ma ua leiloa lona toalua i lenei faalavelave.
O le manumanuga o lenei tama e pei ona ia taua, o le matagofie o Samoa ua matua aafia lava ma na ia taua e tatau i tagata o Samoa ona vaai faalelei ona laufanua aemaise o le toe vaavaai i auala e fausia ai mataaga faapenei ina ia mautinoa le saogalemu e le gata i tagata asiasi mai i Samoa aemaise foi o tagata lava ia o afioaga taitasi talu ai le faigata o nei faalavelave faalenatura ma le vave ona fano ai o soifua.
Ua faafetai foi lenei alii i le toe foi mai ai i Apia na agai atu ai i se faleoloa i le taulaga ua ia le iloa le igoa, ae a o taumafai ai e faatau ni nai manaoga mo lenei taimi ae popo lona tua e ni tamaitai se toalua o le faleoloa ma tuu atu ia i laua ma lona toalua ni pusa faguvai se lua.
“O le faleoloa lea na ma o i ai i le vaiaso na tea ma faatau mai ai ni ie Samoa, ma na manatua lava maua e le faleoloa. E le gata i lea o le vaai mai o loo fusi lou ulu, e lei tau fesili lava pe o au na aafia i le galulolo, ae ua na ona tuu mai lava o pusa fagu vai. E te le maua lea ituaiga fesoasoani i se isi atunuu.”
“E ui i le faigata o lenei faalavelave faalenatura ma o le a faagalo gata foi, ae o le alofa ua ma vaaia mai i tagata o Samoa – o tu ia ma aganuu ua ma molimauina a o iai i Samoa,” o se faamatalaga lea a lenei alii.
Na atili faafiafiaina lenei tama i le toe foi atu ai i le Coconuts Beach Resort ae oo ane le pulega ma avane le ato a lona toalua o loo iai uma lana tupe ma faamaumauga a lona toalua aua le toe malaga ai i Siamani. Sa loka i totonu o se pusa i le faletalimalo ma na tafea le pusa ae na toe maua e tagata Maninoa ma faafoi ane i le pulega.
Faaalia foi e lenei tama le agaga faafetai i le Sui o le Malo o Amerika i Samoa nei, lea na ui i ai tagata Europa mo le fesootaiga o vaalele e agai ai i lea itu o le lalolagi.
Faaalia e Axel, o lea ua mafai ona malaga e aunoa ma se tusifolau ma e ui muamua i Amerika faatoa faaauau ai i Siamani ma ua mafai uma lea faigamalaga ona o le vave o fesootaiga a le ofisa o Amerika i Samoa ma ofisa o Siamani i Niu Sila, Amerika ma lo la atunuu.
O le faalavelave lenei e toa 8 tagata tafafao mai ua maliliu ai ae o loo iai lava nisi o loo saili i le taimi nei. O le toatele o tagata tafafao a Niu Sila ia na toe foi atu i le vaalele o le fuavaalele a Niu Sila na malaga mai ai le Minisita o le va i fafo a Niu Sila o Murray McCully i le Aso Faraile o le vaiaso na tea nei.
Mo lenei ulugalii na o la taua e ui i lenei faalavelave e le uma lo la manaoga e toe asiasi mai i Samoa i tausaga o lumanai pe a maua pea le malosi. O ananafi (Aso Sa i le taimi Niu Sila) na toe foi atu ai lea ulugalii i Siamani.