Ua amata aoga a le fanau laiti a afioaga o Saina ma Toamua i ni vaaiga fou i lo latou faleaoga ma ni faaopoopoga i nei potu aoga ona o le aao mafola a le Siteki a Apia Sisifo, o le Ekalesia a Iesu Keriso o le Au Paia o Aso e Gata ai.
E ono lelei vaiaso o faatautaia se galuega tele a lea vaega o le Ekalesia a le Au Paia i le valiina atoa aemaise o le toe faatino o nisi o galuega auā le faaleleia o le nofoaga e a‘oa‘oina ai fanau a lea falelua. O le tausaga na tea nei na talosagaina ai se fesoasoani a le Ekalesia lenei e le Taitaifono, le Tofa Ulu Vaomalo Ulu Kini ma le Komiti a le Aoga Tulagalua a nei afioaga.
O le talosaga o le fia vali lea o le faleaoga tele lava o faleaoga i lea itu o Faleata.
E tasi le fale tele na talosagaina le vali atoa ae na manatu le Alii Peresitene o lea itu o aulotu a le Au Paia, Peresitene Aiolupotea Palauni Talataina e lē manaia se galuega ae fai na o se vaega ae tuu le isi.
O lea na tonu ai loa ia Peresitene Talataina o le Siteki e pei ona ta‘ua ma lana soatau i lenei galuega, le susuga Sauliataputoa Ualesi Kaio o le a vali uma ma isi faleaoga, aemaise o le maota o loo faamautu ai le Pule Aoga i totonu lava o le lotoā.
E fā isi faleaoga faaopoopo na fai i ai le galuega lenei o le toe vali atoa.
E lē gata i lea na toe fausia atoa lava le faapaologa o faleaoga tetele ua vaivai ma ua pala luma. Na toe faalelei uma paipa na faaaogā e le fanau ua lē o toe lelei foi ma se sima ua faapea ona fausia i luma ane o faleaoga tetele nei.
E lei mananao sui o le ekalesia e faailoa mai le tau atoa o lenei galuega ae na o latou ta‘ua o le itu e aupito sili ona tāua o le mafai lea ona a‘e atu le fanau ua mamā ma ua lelei uma nofoaga e a‘oa‘oina ai. Ia maua ai foi e le fanau le soifua maloloina i le tulaga lelei o ia faleaoga.
O le mae‘a la o lea galuega tele na faatautaia ai se sauniga i le lotoā a le aoga ma na saunoa le alii Peresitene o le Siteki, o se tasi ua silia i le 40 tausaga o galue foi faafaiaoga, e leai lava se isi tulaga tāua e tua i ai Samoa ma ona aiga, se‘i vaganā ai a‘oa‘oga ia lelei ma atoatoa a le fanau.
Na ia fautuaina foi faiaoga e lē na o le a‘oa‘oina o le tomai i mataupu eseese faalelalolagi nei, ae manaia lava ma faaopoopo i ai ma mataupu e unai ai le ola kerisiano o fanau a le atunuu.
O le Taitaifono lava o le Komiti a le Aoga, le tofa Ulu Vaomalo Ulu Kini lea na fai ma sui o le faa-falelua a Saina ma Toamua e faafetaia le agalelei faaauau a lenei ekalesia i le atina‘ega o aoga a le fanau o ia afioaga.
E lē o se taimi muamua lea ua faaali ai le agalelei o le Siteki a Apia i Sisifo i le atina‘e o aoga e pei ona faagasolo ai fesoasoani tau i meaafale mo aoga a le fanau i isi foi itu o le atunuu.
Mo le aoga lava ia a Saina ma Toamua sa iai foi se isi fesoasoani, o nofoa, o kesi ma tusiaoga na tauaao atu i ai e lenei lava vaega o le ekalesia a Iesu Keriso o le Au Paia o Aso e Gata Ai.
